علمتـني ..

أعشـق كلمآت هذي الأغنيـه ..

أعشقها فعلاً ..

فهل تعجبـكم مثل ما تعجبـني ؟؟

علمتني وشلون أحب .. علمّـني كيف أنسى ..

يآبحـر ضآيع فيـك .. الشّـط و آلمرسى ..

علمتنـي وشلون أحـّن .. علمنـي كيف أقسـى ؟

سيّـر عليّ .. بس أمسـح دمـوعي ( وروح )

سيّـر عليّ .. جبـلي معـك قلبن وروح ..

سيّـر عليّ .. إذا تذكرت الجـروح ..

يآ طآغي النظره خطآ .. تجزي بهالبخـل العطآ .. !

وانا اللي اهديـتك أمـن .. عيـن ، و ، جفن ..

هذي فرآش .. وذآ غطـآ ..

يا جرح .. من وين أبتـدي ؟

وانته معـي من مولدي ..

عيـّت يدي .. على ودآعـك تهتـدي ..

بس انـت علمّـني الجفا .. دامي عجـزت أعلـمك كيف الوفآ ..

***

فعلاً كلمات في غاية الروعه .. ما أمل منها ..

أحس الشآعر اللي كاتبنها نابعه الكلمات من قلبـه ..

أحب الشعر واحب المحاولات الشعرية اللي أحاولها ..

بحاول انزلها بأقرب وقت ان شاء الله ..

إلهـي ..

آميـن ، ، ~

عيـدكم مبآرك ..!

كآن هذا العيـد ممتع ..

لمة الاهل جميله بصراحه .. تحسس الانسان انه الدنيا بعدها بخير ..

انه الكل يحبه ويحب شوفته ..

شوفة خواتي وامي بخير هي العيد بذاتـه ..

اول يوم العيـد التمينا وضحكنا وسولفنا وتبادلنا العيديات ^_^ وهذا احلى مافي الموضوع ههههه الواحد يحس نفسه بعده صغير ..

ثآني يوم طلعت تمشيت مع توأم روحي وحبيبة قلبـي اختي ..

والوالدة طلعت مع خواتي الكبار راحو الفجيرة يغيرون جو وانا ما حبيت اخلي اختي بروحها فـ تميت وياها ويوم قامت من رقادها طلعنا وغيرنا جو نحنا بعد ..

البارحه رحنا سلمّنا على صديقتنا يايه زياره دبي من عمان ..

كآنت حبوبه وتنحب وتدخل القلب بسرعه وشكلها غير عن الصور ..كانت احلى

وقالتلي اني انا بعد شكلي احلى من الصور وايد وعلى قولتها
 mashallah you are Soooooo pretty !!

اليوم ثالث العيـد .. امي بتطلع مع صديقاتها .. وانا واختـي ماعرف وين بنروح والا كيف بنخطط لهذا اليوم ..

ان شاء الله يكون يوم ممتع شرات امس واول امس ^^

رآحه ..

الحمدلله اليوم أحس براحة نفسيه

وأحس انه أموري ترتبت ..

قرّب العيـد ..

والعيـد فرحه ..

وما تكمل حلاوة العيد الا بشوفة من أحب ..

فـ عساني اشوف كل من أحب عشان يكمل عيدي بشوفتهم ووجودهم ..

خواتي وأمي وكل من يعز على قلبـي ..

واخيراً شوي برتاح من همّ الجامعة ومن الدراسه والامتحانات

وبروح القرية العالمية وبلعب وبستانس

وبقضي وقت ممتع عالنت .. أتجول فالمواقع واكتب اللي فخاطري فالمدونة

بسهر ويا الاهل وبقرا الروايات والكتب اللي اشتريتهن مؤخراً من معرض الكتاب في الشارجه

وخاصه عاد الحين الجو بدا يبرد .. وبتبدأ أيام الامطار والوناسه

ياسلام اول ما اذكر البرد تنفتح نفسيتي لكل شي

واتذكر كل شي حلو وكل لحظه جميله مرت فحياتي

فعلاً البرد مريح

الله يريـح بال الجميع ان شاء الله ..

فقـدآنك ..

فقـدآن والدي أثر على نفسيـتي بشكل كبير ..

30 \ 9 \ 2005

تآريخ اتمنـى العـودة إليه ..

كـي أقّـبل يمنآه ..

كـي أشكره على كل ما بذله من أجلنا ..

كـي أبكي على صـدره ..

أقبّـل قدميـه .. رأسه .. وجنتآه ..

فعلاً انا بحاجه إليه ..

حاجة ماسّـة ..

كنت صغيره .. لا أفقه ..

كنت حينها لم أبلغ الرابعة عشر من عمري .. وانا أعتبر هذا السن طفوله ..

كنت لا أفقه معنى التقبيل .. أنه راحه .. محبه ..

أبـي أريد تقبيـلك وحضنك ..

اشتقت إليـك ...... جداً ..

دائماً أحب الحديث عنه لأنه رجل عظيم في نظري ..

وفي نظر كل من يعرفه .. ويفهمه ..

والله .. والله .. والله ..

أنه قبيـل وفآته بأسبـوع أتاني في المنام .. وقال لي : ودعّـتج الله .. حافظـي على نفسـج ..!!!!

هذا الشيء إلى الآن لم ألق له تفسـير ..

شيء غريب جداً ..

استيقظت تلك الليله أبكي بشكل غير طبيعي ..

أتتني والدتـي : شوه بـلاج سـلامه شحقـه اتصيحين اميـه شوه فيج؟؟ !!

انـا : امييه ابوويه مآآت!!

وآلدتي : بسم الله عليه ما مآت ابوج في حجرته راقد !

( للعـلم كآنت الساعه الرابعة فجراً ووالدتي استيقظت على بكائي )

انا : والله العظيم شفته فالحلم ميت !

وآلدتي : الميـت فالحلـم يا اميه عمره طويل وان شاء الله عمر ابوج طويل .. تعالي وياي الحجره شوفيه والله انه راقد ..

أنا : ان شاء الله ..

مشيت بخطوات سريعة إلى غرفة الوالد .. فعلاً .. انه نائم وبكل هدوء ..

استلقيت إلى جآنبه ونمت ..

وبعدها بأسبـوع .. غآدر هذه الدنيـا ..

رحمـك الله ..

اللهم ارحمه ..

واغفر له ..

وعآفه واعف عنه ..

وأكرم نزله ووسع مدخله ..

اللهم احشره مع النبيين والصديقين والشهداء ..

اللهم انه كان بي رحيماً فارحمه ..

بداية بوح قلبـي ..

لكل من لا يعرفني ..


ولكل من يعرفنـي ..


انا سـلامه ..


من الممكن أن تقرأو ما يروق لكم ..


أحب تدوين كل ما يجول بخاطري من أحاديث .. خواطر .. يوميات .. مواقف طريفه .. محزنه .. كل ما يدور في بالي .. للوصول إلى الراحه النفسيه .. للفضفضه ..


أتجهت إلى انشاء المدونة هذه .. لأنني اعتدت على كتابة يومياتي في منتدى الجامعه ولكن في الوقت الحالي احاول الوصول إليه والدخول ولكن بلا جدوى .. أتوقع وجود خلل ..


أتمنى أن لا تزعجكم فضفضتي ..


أتمنى أن تعجبكم ..


أسلوبي جداً بسيط ..


أحيانا ألجأ إلى الكتابه باللهجه المحليه .. " العامية "


وأحيانا أخرى ألجأ للغة العربية ..


فـ هيا نبدأ بـ بوح قلبـي ..


حياكم الله ..