السبت، 25 ديسمبر، 2010

يبـه شلونـك ؟ ملل هالكـون من دونـك ،،... !

كتبـت في 28 - 7 - 2009

السآعـه 9:33 مسآءً

قصيده اعشقهــا

تذكرنــي فـيك يا اغلى انســان مر فحيــاتي ..!!

وعمري ما فكـرت اغلـي انسـان شرات ما كنـت اغليـك يا تـاج راسـي

اشتقـت لك موووت..!

يا اغلى " أب " ....... احبــك ..


يبه شلونـك ؟

.. ملل هالـكون من دونـك







يبه شلـونك ؟

.. وتمـضي رحلـة الدنيـا



بليــا طلـة عيـوونك .....







يبه شلـونك ؟



وشلـون المـرض ويـاك ؟ " بعـد ماهـّدك بدنيـاك ؟ "





تبي تدري عن أحبـابك؟



عن عيـونن اتغنـّى بك ؟





عن قلـوب دفنها الشـوق ، وإذا جاها الغفـى جابك ..


يبه .. أمي تتخيـلك دووم .. وتغنـي لك مع القمـرا



يبـه .. اللي خذاك بيـووم .. خذا وخذا وخذا



وياماااا خذا ناسن يحبوونــك ..





يبــه ..



حنّـا صرنـا كبـار ،، توفقــنا وتخــرجّنـا



يبـه .. ماعاد فيـه صغـار ،، يمـّوج بهالزمـن كل شي ..





وحنـّا ..... ماتموجنـا ..





على ذاك العهـد نسـري ،، نبيـع العمر والدنيـا ولا تخـلف بنا ظنـونك










يبـه شلــونك ؟



تبـي تدري عن أخـباري؟ عن أفكـاري ؟ وتذكاري؟







أشيـلك داخلـي جمـره ، وبعيـون الحـزن عبـره ، تغرقنـي وتحـرقنـي





أشـوفك نجمـة"ن" تجـبر مراعيـها يراعيـها



واشـوفك للـرجوله "اسم" إذا شد الزمن تقسـي



وأحلم من معـاني الحـلم ........







أحسـك مقبلـ " ن" بكـره وعيـّا لا يجـي بكره











يبـه تذكر زمـانن مر ؟



يبـه تذكر مجـالسنا ؟



وحارتنـا ومجلسـنا ؟





يبـه .. تذكر هدايـا العيـد ؟



صـلاة العيـد .. وبشت العيـد





يبـه .. تذكر سـوالفنـا ؟



لأجل هذا ........



وكل هذا ........







اقـول اليوم يا يبـه .. ملل هالكـوون من دونـك





يبـه وينـك ؟



ولهـت لنـظره من عيـنـك



يبـه وينـك ؟



أشوفه طـّول غيابك !! ومن ودّاك !! ما جابـك !!



قالـوا مايدووم الزيـن



وانا عنـدي أمل للحين



ولكنيّ اعـرفك ويـن ....





يبـه وينـك ؟



عسى الداعـي يبـه بس خيـر؟



عسـاك بخيـر .... مداين تـكرم لعيـنك مدايـن



بس أرجووووووووك علمّنـي



علمنّـي .. يبـه وينـك ؟



سألت أمـي عن رجـوعك ولا كأنـي أعرفـك وين؟



وقالـت : مايدوم الزيـن ..! وانا عنـدي أمل للحـين في رجـوعك





يبـه بس تكفى علمنّـي متى رجـوعك؟





يبـه بس تكفى تكفى علمّنـي ..





وش أحلى من طلـوع اثنين ؟ طلوع الشمـس وطلـووعك !!؟؟







يبـه وينـك ؟





سألت أمـي .. غيابك طال ؟!!



ولا كأنـي أعرفـك وين





وقـالت مثل ما قـالت : حسافه ،، مايدووم الزين





مع كل هذا صدقــني .. انا عنـدي أمل للحيــن











سؤالي عنـك يالوالد صـار كما المـّوال



وأشوفه طال والله طال





حـزين بلحـنه وحـروفه ..يخـاف يموت من خـوفه



وقلبـن كان اقوى قلـب ،، ضعـف من قـسوة ظروفه









يبـه أرجوك علمـني ،،



تشوف اللـي انا اشـوفه ؟



انا اشـوفك نهـار وليل



في وسـط المجلـس تصلـي



وتدعـي الرب ييسـر لي




يبـه ..



ماعاد بي من حيـل .. وين الحـيل؟



وانا أشوفـك نهار وليل ،، مع أنـي ادري ما ترجـع





غريبـه بعدها تدمع عيـوني من همـوم البيـن



ومع هذا أرد واسأل .. يبـه وينك؟



ولا كأني اعرفـك وين





شبكـت العشـر في غيـابك على راسـ"ن" كسـاه الشيب



ومن وداك ما جابـك ..





ولا ادري وش يخبـي الغيـب .. وجرحـ "ن" عذّب أحبـابك



يبـه عيّـا يخـّف ويطيـب





يبـه كل جـرح في هالدنيـا مصـيره بالدوا يلـتم



ولكن البـلا من جـرح نزف فرقـاك بليّـا دم



وهذا الفـرق في جرحـي ...








عجز يلـقى الدوا دكـتور،، انا جرحـي غريب الطور





ينزف بس .... بليـّا دم .. وزاد الهم فوق الهـم



ودام انـك يبه غـايب ،، جروح الغيـبه ما تلتم





بس عنـدي أمل للحيـن ولا كأنـي اعرفك وين















يبـه .. ذكراك تفـرحنـي ..



وفي نفـس الوقت " تجرحـني"



لا من جبت في طاريك دموعي غصـب تفضحــني





يبـه .. تذكر ليـالي الصيف ؟



عرس الحـي ورقص السيـف ؟



وكرم قلبـك مع كل هالنـاس ،، كل"ن" كـان في بيتـك ضيف







ألا ياحيـف ألا يا حيـف



زمن قـاسي زمن قـاسي ..



أخذ مني بلا رحمـه



أخذ مني أعزّ ناسـي



وخلا لي سهـر هالليـل ،، في عيني ضيـف ،، ألا ياحيـف








يبـه وينـك ؟



تعال وشوف ,, كبرنـا مثل ما تمنـيت



درسنـا كل ما حبيـت



نصلـي مثل ما وصيـت



وندعي لك في كل ظروف









يبـه وينـك



تعال وشـوف ،، صحيح الدنيا ما ترحـم



تجرعـّنا التعب انـواع ،، ولكن الأمل ماضاع



وانا عنـدي أمل للحـين ولا كأنـي اعرفك وين


يبـه تذكر شطانتـنا ؟



انا و اخواني واخواتـي ومعانا عيـال حارتنـا



ونلعـب في زوايا البيت







يبه والله انا حنيّـت لذاك الوقت في وجودك ..





ألا ياريت ألا ياريت

ترجع ..يايبه حنّيت





حسافه الدنيا ماترحـم



خذت منا سعـادتنا .. خذتـك بعيـد وخلتنـا





يبـهّ امي تذكرنا بأيـامك قبـل لا تروح



تناديها (ياروح الروح ) تغازلها وتنظر لـك



مثل طفلــه



ملامحـها عشق مفضووح






في ذاك الوقت كنـا صغـار ،،



مع هذا .. كنا نغار .. عليها .. او بعد منها كنا نغار





نحبـك يايبـه ارجع .. مثل شمـس الفـجر اطلع



حزينـه الشمس في غيـابك ،،ونفس الحـزن فـ أحبابـك



وأخاف الشمـس من حزني تغيـب وما بعـد تطلـع







يبـه ارجـع اذا لي خـاطر فـ قلبـك



تعال وزورنـا بس يووم ..مع انه ما يكفيـنا نشوفـك يوم



نبـي حظـنك يدفيـنا



ونشـوفك دوم







ولكن ,,,, قلـّت الحيلـه ويمكـن من البطـا ضـاعت



وقلنـا يوم .....



يبـه سامحنـي بتـرخّـص



قبل ينشـف حبـر الأقـلام



كـلامي بعـده ما خلـّص



ولكـن موعـد الأحلام





حــــــــــــان ..







ولازم اوفّـي له ،، بعـد ماضاعـت الحيـله





أشوفـك .. والوعـد باكـر ،، إذا فكـّر يجـي باكـر





وبرجـع اسألك وينــك





بس لازم تجاوبنــي



ترى عنـدي أمل للحــين ..



ولا كأنـي أعرفـك ويـن



يبـه شلـونك ؟



ملل هالـكون من دوووونك





يبـه شلونـك ؟







وتمضـي رحلة الدنيـا ،، بليـاّ طلـة عيـونك





لأجل هذا ...........





وكل هذا ......................... ...





اقول اليوم يا أبـــويـه







ملل هالكــووون من دوونك






{الله يرحمـك يابـويه ويغمّـد روحـك الجنـه }

مملكتــي الصغيــره .... آحبـ،ـج ..

كتبـت بتآريخ 26 - 7 -2009

السآعه 2:19 صبآحاً ..



غرفتي الغاليه ..

مملكتي الصغيره ,,

كم أحب ان أطيل الجلوس هنـا .. في غـرفتـي ،، بلا صـوت ،، بـلا همـس ،، سوى صـوت تردد الأنفـاس في صـدري !!

السـاعه الآن الثانية صبــاحاً ،، ظـلام يحـّل على المـكان .. ضوء منخـفض منبعـث من إحدى زوايـا غرفتـي ،،

روايـات وكتـب متنـاثره على سـريري ،،

هاتفـي النقـّال ( خارج نطاق الخـدمة ) تجنبـاً للإزعـاج ..

دعـوني ارتـشف قطـرات من المـاء ..........

ها قـد عـدت ،،

افكـر وافكـر وافكـر ،،

افكـار متضاربه .....

لا أعلم إلى أيـن سأصـل ..

دراسه ،، ذكـريات ،، واجبـات ،، مخططات ...!!

لقـد أنهيـت فصليـن في جامعة الشـارقة .. وليـس لي صديقـات !!

النظـرات تلاحقـني ولكـن لا مرحـب لي ..

لا يهـم .. الأهم من هذا كلـه هو الراحـة النفسيـه لـي ،،

ربمـا لأنني لم افرض نفسـي على أحـد لذا لم يتقـدم احـد ليسـألني عن اسمـي وهذا الاقـل ......

،،،،

أبـي ،، كنت شعـاع الأمل بالنسبـة لـي ،، ولكـن ....................... رحمـك الله ..... :7leelh:

,,,

بعثره بعثره بعثره ..!! كلمـات متبعثـره ،، أنطق بها من دون ترتيـب ..

منتداي الغالي ،، ليس لي أحد لأبوح له سواك .. انت واعضاؤك .. احببتكم على الرغم من انني لا اعرفكم ..

فهناك عامل مشترك بيني وبينكم .. وهو ( الحرم الجامعي ) للدراسه ..!

,,,,

افكر في أن أخلـد للنـوم ..



فهو الشيء الوحيـد الذي سوف يبعـدني عن هذه البعثره ..

تصبحـون على خيـر .. أحبـكم ..

هـّم الدرآسه ...

كتبته بتآريخ 24 - 7 - 2009

الساعه 4:41 العصـر^^

سـلامه هنـا من جـديد

شـاله هـّم الدراسه !! مادري لين متى بتم افكر فالدراسه !

كل ما اقابل حد
( هلا سـلامه شخبار الدراسه وياج ؟ )

( هلا سلامه من زمان ما شفتج ، وين تدرسين الحين ماشاءالله ؟)

( هلا سلامه كم يبتي فالثانويه العامه وشوه تخصصـتي ؟) ..

وطبعا اجوبتي كالعاده ..
الحمدلله الدراسه اوكيه ..
ادرس في جامعة الشارجه >> وردة فعلهم كالتـالي ( افا ليش ما دخلتي الامريكيه ؟ ) !!!!!

والله العظيم اكره هالرد كره شدييييييييييييد !!

ليش شوه الفرق بين جامعتنا وبين الجامعة الامريكيه .. انا احس انه مستوى جامعتنا افضل من الجامعه الامريكيه وهذي الجامعه تناسبني وخصوصا اني خجولة بشكل غير طبيعي !! يعني ارفض الاختلاط في الدراسه بشكل حاد ..

امممم شوه بعد

ردي على سؤالهم الاخير دايما يكون في منتهى البراءه ..!! وهو ( ( هلا سلامه كم يبتي فالثانويه العامه وشوه تخصصـتي ؟) ..) ...... جوابي : يبت 93% .. وتخصصت اعلام .. وطبعا ردة فعلهم تقهرني موت .. اتمنى الارض تنشق وتبلعني ولا اني اسمعهم وهم يقولون هالكلام (( عاد انتي تتخصصين اعلام ؟؟؟ افااااااااا .. عيل حق شوه متعبه عمرج فالمدرسه ودرستي ويبتي نسبه زينه ؟؟والله ماعندج سالفه ! لو دخلتي هندسه احسن لج .. لو دخلتي ادارة اعمال احسن لج ،، لو درستي طب بيكون افضل !! ما توقعنا انج تدرسين اعلام لأنه سخيف وسهل ومادري شوه )) يعني على بالهم الاعلام اسخف مجال مع اني احبه من كل قلبي وانا كنت مقتنعه فيه اقتناع تام لكن مافيه احد يشجعني وانا كسرت كلمتهم وغصب عن اللي رضا واللي ما رضا دخلت المجال اللي يعجبني انا .. اللي اشوف نفسي فيه ،، وما علييه من كلام الناس .. والمشكله انه اللي يقول لي هالكلام .. حتى شهادة ثانوية عامة لا يحملها .. او انه يحمل شهادة الثانوية العامة بنسبة ما تتجاوز الـ 60 % .. يعني لو يايني هالكلام من انسان متخرج تخصص اعلام بتقبله بصدر رحب لأنه بيكون خاض هالتجربه وعارف كل شي فيها !!!!!

بس ماعليه ..

وش على السحــــاب من نبح الكــــلاب

لي عودة بعد ما تهدأ اعصابي
 
 
 
 
----
 
 
كنت في هذا اليوم معصبه من موقف صآرلي وطبعاً صارت الفضفضه كلها في بـوح قلبي ^^

منتدى آلجآمعه !...

رجّعوا منتدى الجامعه

بس الظاهر انهم باعوه لـ جامعة أخرى ..

دخلت وانصدمت بـ اسم المنتدى لأنه اتغير ..

وكل اللي بسويه الحين ..

أني بنقل كل شي كتبته فالمنتدى إلى مدونتي الخآصه ..

مع تاريخ الكتابه

وان شاء الله تستمتعون فيــه ^^..

بسم الله بدينــآ ...

الخميس، 23 ديسمبر، 2010

فضفضه بـلا عنوآن ....!

عمري ما تمنيت اكون مثلج

انتي كسرتي كل شي فيني

صح احبج .. اعزج .. وانتي على راسي

لكن احيانا تصرفاتج تذبحني .. تكسرني ..

عمرج ما بتفهميني .. عمرج ما بتوجهيني للصح

اعيش حياتي على البركه .. وعلى ما تعلمته بروحي

ضيقتي منج ..

اتمنى اييج يوم بروحج تين تحضنيني ..

تبوسيني وتحسسيني انج قريبه مني ..

تخافين علي ..

احس فخاطري كلام وايد ابا اقوله بس مب عارفه ارتبه .. مب عارفه كيف اطلعه مني ..

انا مكسوره من داخلي وايد ..

ابيّن العكس دايماً .. اضحك واسولف ولا يهمني شي ..

بس في داخلي شي ثاني ..

شي غير عن الواقع اللي الكل يشوفه

يمكن كلامي مب مرتب .. ومب عارفه كيف اصيغه .. بس اهم شي اني يالسه افضفض

اكره طلعة الليل ما بعد الساعه 12 ..

احسها تجرحني .. تعكّر صفو حياتي بكبرها ..

ولو حتى كانت لضروره ... {أكرهها} ..

احتاج للراحه .. احتاج اتنفس هواء نظيف ..

احتاج لـ أحد يخفف ما بداخلي ..

يشل عني كل شي ..

احتاج لـ أحد يعرف كل اسراري .. كلها كلها ..

احتاج لـ أحد أبوح له بكل شي ...... ويعرف شوه هو {بوح قلبي} ..

شخص ..... عارف انا منوه اقصد بكلامي ..

هل انا اقصد اخت ؟
هل انا اقصد صديقة ؟
هل انا اقصد حتى أم !!!!

الأم احساس دافي ..
احساس بالراحه والطمأنينه ..

حضن الام يساوي الدنيا واللي فيها .. فقط للي يحس بحنان امه
الجنه تحت اقدام الامهات مثل ما يقولون ..
وانا احاول قد ما اقدر اني احصل على هذي الجنة ..
رغم كل شي
رغم ضيقي
رغم انكساراتي
رغم الضجيج الساكن في داخلي
رغم صراعاتي النفسية

ومثل ما قال الرسول صلى الله عليه وسلم
{أمك ثم أمك ثم أمك}
صدق رسولنا الكريم



استغفر الله العظيم ...... الجمل مب متراكبه .. كلامي مخربط ..
ابا ادخل على شي ثاني ..... كلام ثاني وسالفة ثانيه ...... تحملوني تراني مب عارفه شوه يالسه اقول ......


ذكرتك ودمعي فوق وجناتي ترى دفّاق ..
رجيت الرب يرحمك ويعفو عنك يالغالي ..
حبك سكن ف عروقي وتغلغل الى  الاعماق
تدفق من عيوني مطر وجوي لا مايصفالي ..

...


في خاطري شي ..
أنام ..
اغلق اي شي يوصلني بالعالم الخارجي
سواء كان انترنت
موبايل
بلاك بيري
و حتى { باب غرفتي } !


ما اتحمل اشوف ولا شخص جدامي

يارب ارحمني
يارب ارحمني
يارب ارحمني.......

بحاول انام

وبحلم
بحلم
بحلم


انا مابا اضايق بـ نفسي اكثر

بس شوقي لأبويه ما ينعد
يمكن لأنه محد يفهمني غيره ؟
أو يمكن لأنه ف وجوده عمري ما تضايقت؟
أو يمكن شوقي له من ربي
أو يمكن
ويمكن ويمكن !!!!


والحين..
بحضن مخدتي ..

وبتخيلها شخص يحبني
أو حضن أم دافي
أو شوق شخص لي
أو حتى بتخيلها {أبويه}

لي عودة .. تراني مشتاقه لمدونتي موت

تصبحون على خير ..

الخميس، 2 ديسمبر، 2010

عآد عيدج يآبلادي ..

كل عآم والامارات بخير

وكل شعبها من مواطنين ومقيمين وحتى زائرين

اتحادج ألّف قلوب وقلوب وقلوب ..

زرع المحبه في كل صوب ..

إماراتي انتي شي عظيم

انتي تعنين لنا الكثير ..

الله يحفظ الامارات حكومةً وشعباً ويديم المحبه والراحه والوناسه علينا اجمعين

اليوم تنطلق مسيرات الفرح ..

مسيرات التعبير عن الوناسه ..

الاحتفالات والسيارات المزينه في كل مكان

الضحكات تنسمع في كل مكان

فعلاً راحة نفسية لما الواحد يعيش في جو كله فرحه ولمّه ..

تشوف الاماراتي يضحك ومستانس
تشوف المقيم يضحك ومستانس

وهذا كله دليل على الراحه

ياسلام عليج يا اماراتي

الله يحفظج يآرب والله يديم أمنه وأمانه علينا اجمعين ..

لي عودة بأحداث المسيرة ..