الجمعة، 29 أبريل، 2011

أحدآث يوم ميلآدي . . .! حدث في 14-4-2011

يوم ميلآدي ..

لطالما انتظرت هذا اليوم

كما يقولون :" عشان اعرف منو يحبني ومنو بيتذكرني فيييه "

دقت الساعه 12 !

دقت ساعتج يا سندريلا سلامه !

فهالاثناء كنت رايحه انام .. وانا ناسيه انه اليوم يوم ميلآدي ..

سكرت باب غرفتي .. طحت على شبريتي وخلاص بنآم

سمعت دق على باب غرفتي ..

بطلت الباب ..

اختي ماسكه هديه ومعلقه فيها بالونااااااات حلوييييين

وامي معاها

استااااانست بشكل غير طبيعي

كنت بصيح من الوناسه ..

شوي ظهرت معاهم فالصاله علشان اشوف شوه يايبيلي ..

وصلني مسج ..

اطلعي برع !!

يايبيلي كيكه عليها صوورتي !!!



وبآقة ورد !!


يا الله !!

حسيت الدنيا ما توسعني من الوناسه ..

حسيت انه فيه ناس يحبووني !! وانا اموووت عليييهم . .!

ولحظه براويكم اختي شو يايبتلي وبراويكم البالونات كيف حلوين ويجننون





المهم يلست ويا اهلي وكلنا الكيييكه اللذيذه .. يسلم من يابها لي ^^

ثاني يوم وصلتني هدايا ثانيه

براويكم اياها ^^


همسه : الورد الاصفر يعني الغيره . . . !



وفي هدايآ كثيره ما صورتها

هاللي صورته بس

اشكر كل من ذكرني في يومي الخآص فيني ..

برجع اكمل احداث يوم ميلادي في وقت آخر

لأنه الجو اللي انا يالسه فيه الحين ابداً ما يساعد

الصاله صارت ازعاج

لي عوده



الجمعة، 1 أبريل، 2011

إحساس جميــل .. ..

صح اني كنت مقصرة في حق مدونتي وآيد الفترة اللي طآفت

بس احس انها قريبه مني وايد..

حالياً .. انا فالصآلة ..

ارتشف قطرات من الشآي مثل ما يقولون ..

احس الارتشاف يعطي معنى جميل للكلمة مادري ليش

يحسس بالدفء

مممم عندي وايد اشياء ابا اسويها بس مخلتنها على الله *_*

وما ادري متى بسويها

حالياً احس بفترة نقاهه يمكن لأنه ماعندي امتحانات

بس اروح الجامعة احضر محاضراتي وارجع

بدون امتحانات وصدعة راس

ياريت الجامعة تلغي شي اسمه امتحانات احس بنرتاح هههه احلام الفقارى

لي عوده

الجمعة، 11 مارس، 2011

جُمعَة الخلاصْ . . .‏

الكلمة الأولى دائماً الأصعبْ . .
هذا ما أدرِكُه جيداً

 مذ بدأتُ أمسِكُ بالقلَم

حتَى أترجِمُ بعضَ مشَاعرِي إلى . . . 

 كلمَات تُقرأْ . . .

الكلمة الأولَى هيَ

"آدَمُ الكلمَات" . .


هيَ المخْلُوق الذي يُولَد علَى كوْكب جديدْ مُحملاً بمسؤولية التعميرِ والتكَاثُرْ . .

لذلِكَ تأتِي دائماً بصعُوبَة . .

 ليسَت كل الكلمَاتْ تصلُحُ لهكذا دَوْر . .

نحتَاج إلى كلمَة مِنَ الطبقَة المخمليّة , ومِنَ المستويَات الأرقَى على الإطلاقْ . . 
كلمَة خُلقَتْ لتكُون مُنطلق ذريّة الكلمَات . .
 ونحْتَاجُ إلَى ورقَةْ تُحرضُنَا علَى الكتَابَة ,

 كَوكَبُ من أسطرِ فارغَة ليستقر عليهَا أبنَاء هذه الذرية ,

ومساحَات بيضاء ليغرقوا بها أيضاً . .
حتماً ليسَت كُل الأقلام تُساعدنَا على إنجاب الكلمة هذه ,

ولا كل الدفاترِ تمنحنَا حقّ التبني إذا ما شُخّص عقلنَا بعُقم الأفكَار علَى حينِ

جموٌد. .
مُذ قرأت مقولة أحلام مستغانمي

 التي تخبرنا بأن ثمة أقلام ندري منذ اللحظة الأولى التي نشتريها فيها ,

 والكلمة الأولى التي نخطها بها ,

 أننا لن نكتب بها شيئاً يستحق الذكر ,

 وأن مزاجها الكسول ونفسها المتقطع لن يوصلانا إلى الأنفاق السرية للكلمات ,

 حرصتُ علَى أن اختَار القلم المناسب , والورقَة الصحيحة . .

حتى أنجب كلمة أولى تليق بنص يُقرأ فيما بعد . .

كلمَة ستكون منبعَ لشعُوب تختلفُ في المعنَى والإحسَاس والنُطق والإعرَابْ . . .

الشعُوب التي ستحتاج لاحقاً إلى حكام ليخضعوا لهم ويكتبوا عنهم ,

ودستور عاطفة حتى لا يعيثوا في الورقة فساداً ,

 وحدود لغوية إقليمية تُجبرهم على إشهار جوازات سفرهم

  إذا ما اختاروا الهجرة ما بين مقدمة النص وخاتمته . .

المشكلة في كلمتي الأولى أنها  . . .

دائما تلد شعوباً ثائرة , شعوب لا تقبل الخضوع لحاكم واحد , ولا تؤمِنُ بدستُور

 قناعات ثَابِت . .

شعوب جاهلَة لا تعترف بقيمة الأوراق الرسمية وجوازات السفر ,

 و لا تتصرف إلى بناءً على غرائزها الداخلية ,

 ولا تكترث بأي شيء آخر . .

هكذا أكون انا عندما أكتب , أعجز تماما عن الكتابة لشخص واحد ,

 عن قضية واحدة , و بعاطفة لا تتغير بعد بضع دقائق من كتابتي للنص . . !

لذلِكَ تعمّدت معَاملتهَا بخُبث هذه المرّةْ . .

تحدّثتُ عنهَا دَون أن أدركَ ماهيتهَا . .

 و بدأتُ نصّي هذَا وأنَا لا أعرفُ الكلمَة الأولَى , لأجدَ أجيالِ من كلمات تتوالد هُنَا ,


 أجيال بلا هوية ,

تتلفت بذهول على سطح الورقة البيضاء ,

 وتتعثر مرارً بالأسطرُ لأنها لم تجد "الكلمة الأم"

لتُشاركهَا الانتقَال من مرحلَة الحبو على الورقة إلى مرحلَة الركض بشغب . . .

غيرَ أنهَا مُرغمَة على ترجمَة عواطِف مُبهمَة تقبَع في قَاع ذاتِي دون حرَاكْ . . . .

ومن يدري . .




ربما تثور هذه الأجيال المذهولة الآن , بعد ثلاثين سنة , لتطالبَ بالحريّة ,


وربما "بالطيران بدلَ الركض"


كتعويض على حرمانها من هوية تمنحها كيان مستقلْ . .

والأجدرُ بذلك أن يكون في جمعَة يطلقون عليها لاحقاً


 بـ "جمعة الخَلاص" . . .

.
.
5 / 2 / 2011م

بقـلم صديقتـي / عاشـه الطنيـجـي ،،..

ماشاءالله أبدعتـي ..

الاثنين، 14 فبراير، 2011

بعيــــــده عـني لأبعـد الحدوود ! + مقتطفات جآمعييية

ليش ما تحسسيني انج قريبه مني ؟

ليش ما تسألين عني ؟

ليش ما تهتمين فيني ؟

ليش ما تسأليني لو انا ناقصني شي ؟ لو انا محتاجه شي ؟

لهدرجه انا ما أهمّج ؟

والله صرت اتوقع اني ما اهمج

ليش ما تلقين لي بآل ؟

انا احتاج احد يسأل عني .. يهتم فيني .. يتقرب مني .. يحسسني انه الدنيا بعدها بخير

والله انه الغريب والبعيد يسأل عني اكثر مما انتي تسألين

يهتم اكثر مما انتي تهتمين

ولو حتى هو كان يصطنع هذا الاهتمام .. بس بعد يهتم .. النتيجه وحده .. سواء اصطنع او ما اصطنع

وانا اقول انه اصطنع اهتمامه لذوي العقول المغلقه اللي يقولون انه الغريب ما يسوي شي لله .. يعني يبا شي فالآخر

وانا اقول لا

بالعكس الغريب يمكن يرتاح لي اكثر لأني انا ما اقرب له .. ودايما يقال ( أقرب لك .. عقرب لك ) و يقال بعد ( الأقارب عقارب ) يعني الواحد لو تجيه الصفعه من الغريب احسن من  ما تجيه الصفعه من القريب ..

انا احس اني متضايقه .. من داخلي متضايقه

ولو اني اضحك وأبيّـن للكل اني مستانسه ولكن صدقوني انا عكس هذا تماماً!!!!!!! والله العظيم عكس هذا تماماً ..

والله والله والله ثم والله ..

اني انا افضّل اني اقضي يومي كله فالجامعة

عالاقل الجامعة اشوف فيها وجوه يديده .. ناس يداد كل يوم ..

وكل ما يشوفني حد يسألني عن اخباري وعن حياتي كيف هي وحتى لو انا شايفه هالشخص البارحه

يسألني انتي شخبارج ؟ وكيف حياتج ؟ وشو سويتي  ؟ وين طلعتي ؟ شو كلتي ؟

والله الاهتمام ينحّس ولو انه هالاسئلة البعض منكم يشوفها روتينية

يعني عادي تنسأل

بس والله لها وقع في داخلي بشكل غير طبيعي

اليوم شدني كلام بنت تعرفت عليها .. وهي تصير صديقة صديقتي .. دايماً كنت اشوفها وتعجبني سوالفها .. اشوفها من بعيد لـ بعيد ..

قالت بـ لهجتها السعودية  الجميلة ..

( و ربي انا احبها هذي الجامعة ! والله احس اني في بيتي ..وبين عايلتي .. وربي احس الجامعة شي كبير .. شي حلو .. احس كأنه نحنا أسرة متكاملة .. وربي حتى الفرّاشة احسها زي خدامتنا طيبه كذا .. وحتى ذا الهندي اللي يشتغل هناك كأنو فرد من افراد العائلة .. واحس الدكاترة زي آبائنا .. وأحس البنات اخواتي .. وربي ارتاح فالجامعة ارتاح .. ماراح احس ولا راح تحسون بـ لذة هذا الشعور الا لمّا تتخرجو . زي ما احس انا فيه دحين لأنو تخرجي قرب ) ..


فعلاً كلامها صحيح .. وانا احس بهالشي من زمان بس ما تجرأت اني اقوله جدام حد .. علشان ما يقولون هذي ناقصه حنان !!

مع انه ما اعتبر انه هالشي حنان ناقص .. بالعكس .. اللي يقول هالكلام يبين عليه انسان طيب وخلوق ويحب الناس اللي حواليه ..


بديت اتأقلم شوي شوي بـ جو الجامعة و أدخل في سوالف وأحاديث مع البنات ولو حتى ما اعرفهم .. مجرد ما اقعد وياهم على نفس الطاولة نبدأ نتحدث .. في اي شي .. في اي موضوع .. سوالف سوالف سوالف مختلفة .. تارة نتكلم عن الدكاترة .. وتارة نتكلم عن المواد .. وتارة اخرى نتكلم عن الحياة بشكل عآم ..

مممممممم

هدوء يعّم المكان اللي انا يالسه فيه الحين ..

أسرح بـ أفكآري للمدى البعييييييد ..

اتذكر حياتي قبل ..

ما اصدق اني انهيت دراستي في المدرسة ..

احس انه بعدني صغيرة وما ابا اكبر علشان ما تزيد اعباء الحياة

ولو انه الاعباء بدت تزيد من زمان ..

اسمع حالياً صوت طقطقة اصابعي على الكيبورد ..

مسكين لاب توبي مستحملني ^^

ممممممم ..

شكلج ماراح تسألين عني .. ولا راح تهتمين فيني .. تتصلين فيني بس لـ حاجة ..

وا أسفآه على زمان مثل هذا

لا يسأل احد عن احد

كل حد لاهي بحياته وتهمه مصلحته ..

فضفضة غريبه .. ولكنها قريبة جداً .. بل كل القرب من الواقع ..

...............................


قبل كم يوم .. يتني حالة عصبيه غير طبيعية .. ما كنت اتحمل اسمع صوت احد .. رحت الصالة وسكّرت التلفزيون بكل عصبية ..

رحت غرفتي ..

تكلمت فالتيلفون وتضاربت مع اللي كان متصل فيني ( شكله امه داعيه عليه ) ,, وططططرررااااخ رميت التيلفون على الجدار بحركة سريعة .. وتناثرت اشلاء الموبايل الخاص فيني وللعلم ........ الموبايل يديد كنت قبلها بيوم ماخذته .. شكله مب من نصيبي ^^ يفداني ..

مب عارفه والله شو يالسه اكتب ..

دايماً الجأ لـ مدونتي يوم اكون متضايقه .. يوم اكون فرحانة .. يوم اكون ابا افضفض ومب لاقية احد افضفض له .. مثل ما قلت كل احد لاهي بحياته ..

رحت اليوم الجامعة حضرت محاضراتي .. ووووووووه !! صارت لخبطه فالجدول واتبدل فوووق تحت ..

هذا الدكتور ما يناسبه وقت المحاضره
وهذا الدكتور عنده تعارض محاضره ثانيه في نفس وقت المحاضره هذي
وهذا الدكتور مب طارح مكان القاعة فالجدول
وهذا وهذا وهذا الخ الخ الخ ..!!

خربطات جامعية لا اكثر ولا اقل ..

واليوم صارلي موقف بعد ههههههههه بخبركم اياه ..

بما انه اليوم كان اول يوم احضر هذي المحاضرات .. فـ اول محاضره لي كانت الساعه 9 ونص الصبح
قمت من الرقاد الساعه 7 ونص لين ما جهزت ولبست وشربت الكرك اللي مالي غنى عنه وخاصة انه دوامي اليوم طويل للساعة 5 يعني محتاجه اعدل مزاجي شوي ولا بيضربني صداع وما بيفج عني موول

طلعت من البيت .. ( توكلنا على الله .. )
وصلت الجامعة قبل محاضرتي بربع ساعة تقريبا .. وطبعاً قاعة المحاضرة مب محددة عندي فالجدول
رحت مبنى كلية الاعلام وادور وادور وادور بلا جدوى ..
قالت لي صديقتي روحي على ادارة القبول والتسجيل وقوليلهم انه مكان القاعة غير مطروح عندج وهم بيفيدونج ..

رحت للإدارة .. الإدارة بااااااردة . . كأنه في القطب المتجمد الشمالي .. برد لا يطاق .. و أوردي برع برد .. شكلهم الموظفين ما يحسون ..! اتوقع هذا !

رحت لـ مسجلة الكلية ..بعد انتظار دام ربع ساعة

قلتلها : السلام عليكم صباح الخير
قالتلي : عليكم السلام والرحمه هلا اتفضلي؟

الموضوع كذا كذا ..

ردّت بكل برود .. : حبيبتي الموضوع مب عندي تقدرين تروحين للمبنى الفلاني وهم بيفيدونج

اااه يا الله صارت الساعه 10 الاربع (9:45) وللحين محد فادني .. فات على وقت المحاضرة ربع ساعة يا الهي

رحت عند الموظفة اللي قالتلي عنها ..

كلمتها وقالتلي لحظه اجيك على السيستم ....

عفواً سلامه .. مب طالع عندي شي !

طبعاً سلامه هالوقت تبلع ريقها .. اكره هالمواقف ..

قالتلي لحظه ادور لج فالجداول ..

مسكت كومة من الاوراق والجداول وصارت تبحث فيها

عفواً سلامه شو اسم مسآقج ؟

سلامه : مقدمة في الاعلام الالكتروني *_*

مممممم ما في ! مب طالع عندي مكان القاعة .. بس تدرين شو؟

انتظري عالكراسي اللي برع .. ترى مكتب الدكتور عند الكراسي بالضبط ..

انا بخطوات متثاقله خطيت ... ورحت يلست على الكرسي لا حول ولا قوة .. اف اف اكره التأخير وأكره اللامبالاه ..

طبعاً هذي مشكلتنا في بداية كل كورس
انه ما ندل وين كلاساتنا

شوي اشوف صديقتي موزه يايه ومعاها صديقتها ..

هلا سلامه شو تسوين ؟؟

قلتلها : ماشي والله ادور كلاسي ومب محصلتنه ..

اي مادة عندج ؟

قلتلها : مقدمة في الاعلام الالكتروني

اووه ترى ربيعتي وياج ونفس حالتج مب محصلة الكلاس

هههههه وحليلها ربيعتها استانسسسسست واخيراً حصلت حد معاها

وبيني وبينكم انا بعد استانست اني حصلت لي ونيس ضايع معاي

المهم رحنا انطل كل شوي في كلاس لين ما حصلنا الدكتور ..

استااااااااااانسنا يوم حصلناه ..

دزيت البنيه قلتلها بليز بليز انتي دخلي اول .. اكره الاحراج

وطبعا كانت الساعه 10 وربع

يعني باقي نصف ساعة وتخلص المحاضرة

يارب سلّم !

دخلت البنيه .. وانا وراها ..

( دكتور والله العظيم نحنا كنا اندورك واندور قاعة المحاضرة ومب محصلينها والله اتوهقنا انته وينك نحنا يالسين عالكراسي هاي اللي عند الباب والله دكتور ترى ............. وقاطعها الدكتور بـ كلمتين في الصميم " يعني ايه ؟ آعدين على شط النيل ! كل ده تأخير يالله خشوو " )

وضحكو البنات اللي فالقاعه وفي نفس الثانية وانا اركب درج المدرج قلت بصوت مسموع ( بدال لا تضحكون جان دليتونا على مكان القاعة .. ياسخفكم ) .. وقعدت ..

وعدّت المحاضرة على خير وكان الله غفوراً رحيماً ..

والله احس انه البنات اللي فالجامعة خواتي من كثر ما احبهم وارتاح لهم .. طبعاً مب الكل ..

الله يديم المحبه

الحين احس نفسي شوي ارتحت

ممممممم

احب هالشعور اللي اييني بعد الفضفضة ..

تضارب سريع في دقات القلب

برودة ..

رآحة نفسيه

رغبة في النوم العميق

شكلي بروووح بناااااااام الحين

تصبحون على خير

أحبــــــــكم ..

السبت، 12 فبراير، 2011

هـذي الـروح ....!؟

هـذي الرؤح .. ‘‘ تـشتآق إليـك ..!

هـذي الرؤح .. ‘‘ لـك تـشتآق ...!

ومضيـت .... وكأنمـا .. أعجبـك ‘‘ الفرآق ..

وتركـت الذي كآن بينـنا للـ نآر والإحتـرآق ..

(( هي الـروح )) ..!

تشتــآآآق ’’ ..


الأربعاء، 9 فبراير، 2011

انتهت ومآحسيـت...!

انا هنآ من جديد

احس وايد مقصرة في حق مدونتي

ما ادش وايد

ممممم يمكن مشاغل الحياة ..

والله خلصت السمستر وامتحنت فاينلز وخذنا اجازة والحين بنبدا السمستر الثاني وانا والله ولا حسيت

صار اليوم كـ دقيقه ..

والاسبوع كـ ثانيه ..

والشهـر كـ أقل من ثانيه ..

وربي ما قمت احس ..

انتهت الاجازة واحس ما سويت ولا شي مفيد فيها ولا استفدت منها ولا استانست حتى ..

ياسبحان الله :(

ان شاء الله معوّضه :) ..

كله خير

وان شاء الله لي فضفضة اخرى ..

الأربعاء، 19 يناير، 2011

غريبـه !

غريبه الدنيا والله

تلاقي الشخص اليوم معاك يضحك ويسولف وتتبادلون الاحاديث والمواضيع

فجأه ..

يغيب عنك

لا حس ولا خبر

ويوم تسأل عنه وتحاتيه

وينه وينه ؟؟

يقولولك مآت !

ياهي غريبه هالدنيا

مافي اي مجال للزعل او للضيق

المفروض الواحد يعيش حياته مع اللي يحبهم ويحبونه بدون اي ضيق او زعل او تكدير خاطر

الواحد ما يعرف متى بيفارق هذي الدنيا الـدنيّـه !..

الله يرحم جميع موتانا

الله يرحمك ابويه ..

الله يرحمك عمرآن ..

الله يرحمك عمّـي

الله يرحمـج عمتي ..

اللهم ارحم جميع اموات المسلمين واشفي مرضاهم ..

اللهم امين

لازم نعيش حياتنا وما نخلي شي يأثر علينا

بعد لا اعتراض على حكم الله

كل انسان بيومه و بساعته

الله يرحمهم اجمعين ..

الجمعة، 14 يناير، 2011

تم ..

تم بحمد الله ^^

نقلت كل ما كتبتـه من بوح في منتدى جامعتي إلى مدونتي الخآصه ..

اتمنى لكم متآبعة سعيـدة

موقف مضحك ويفشّـل هههههه

كتبت فـي 21-10-2010

12:11 مساءً ..

صارلي موقف ايضحك قبل شويه في الكلاس ..



طلب مني الدكتور اني اسير اييب الرمونت مال البروجكتر وطبعاً اتوهقت البطله سـلامه ..


لأنه ولا مره فحياتي احد طلب مني اني اييب الرمونت وطبعاً طبعاً انا ماعرف من وين اييبونه ..

قلتله اوكي وانا اضحك وطلعت من الكلاس ولا ادري شو السالفه



نزلت تحت شفت بنات قاعدات ورحتلهن .. قلتلهن بكل عفويه ( بنات النجده ابا الرمونت مال البروجكتر من وين اييبه !! ) ضحكوا قالولي روحي هالمكتب من عندها الرمونت .. قلتلهم اوكي وانطلقت اركض وسبحان الله انه هاليوم هو اليوم الوحيد اللي البس فيه كعب من سنة الف ما لبست كعب فالجامعه !!


رحت المكتب قلتلها السلام عليكم ممكن الرمونت ؟ قالتلي حبيبتي اي قاعه انتي ؟قلتلها 101 ! قالتلي عشان ما تتعبين نفسج تركبين وتنزلين تركبين وتنزلين روحي مكتب مجد فوق بتعطيج احسن .. لونه اسود مثل هذا .. قلتلها اوكي ..رحت عند المكتب اللي فوق وماكان فيه حد .. اترييت دقيقتين ثلاث ويت .. قلتلها السلام عليكم ممكن الرمونت .. قالتلي اوكي شغلي ورديه الله يخليج .. قلتلها اوكي ..


خذت الرمونت ورررركض على الكلاس .. وصلت وبطلت الباب قلت : اسفه ماكانت موجوده .. جان يبتسم لي الدكتور وهو فيه ضحكه والبروجكتر شغّال .. لا تسألوني كيف شغلوه .. شكلهم ملّوا وهم يتريوني .. جان يطلع مني صوت عفوي ( أه !! شغلتوه ) هههههههه


ورحت رديت الرمونت وقلتلها وبكل أسى !! شغلوه !!


هههههه ورجعت الكلاس مره ثانيه وكان الله غفوراً رحيماً ..


فلو سمحتوا يالدكاتره لا تطرشوني مره ثانيه لأني ما أدل ...ههههههه


لي عوده..

حضرتك مآتشوف ؟

كتبت فـي  17-10-2010

11:49 مسـآءً ..

بما أنه الشتا بدا يدخل علينا وبدينا نحس بالوقت فليل يمر ابطأ من البطيء ..

انا بديت أمـلّ !

ولكن اموت في ايام الشتا وبطئها ..

انزين خلوني افضفض ..

ذاك اليوم كتبت وقلتلكم بخبركم عن السالفه اللي صارت لي عن سيارتي ..

كنت رايحه هذاك اليوم العربي سنتر ويا اختي رايحين نخلص شغلة فالاتصالات اللي هناك ..

دخلت الاتصالات .. قعدت عالكرسي وبدينا نتكلم مع الموظف عن الشغله اللي محتاجينها وكل الامور على ما يرام ..

شوي رن موبايلي رقم غريب يبدأ بـ 04 وكله ستّـات 666!,.!!

من يا ترى ..

انا : يا الله ما اداني ارد على ارقام غريبه

اختي : سوسو منو متصل فيج ؟

انا : والله ما ادري رقم غريب وصفر اربعه مادري منو لا ومرتب بعد ياسلام

اختي : انزين ردي شوفي منو يمكن حد يباج او في شي ضروري

انا : لا والله ليش انا كونزاليزارايس ! << مادري اذا صح جي اسمها او لا

اختي : لا ياحبيبتي اهم منها .. ردي شوفي منو

انا : اففف امري لله ..

والمكالمه كالتالي : ....

الوه ؟؟!!

السلام عليكم اخت سلامه ..

انا وبكل دهشه !!! وعليكم السلام والرحمه هلا ؟؟

معاج العمليات شرطة دبي

( صاعقه طبعا ..! )

هلا اخوي شو في !!!! << خفت كأني مسويه جريمه

انتي حاليا موجوده في العربي سنتر صحيح ؟

هيه موجوده خير ان شاء الله ؟

كل خير اختي لا تخافين .. بس فيه واحد دعم سيارتج وهو الحين موجود فالباركنات ..

مع السلامه

اوكي فمان الله ..


طبعا الخبر كان كالصاعقه ههههه نظراً لمحبتي الكبيرة لهذي السيارة الغاليه على قلبي جداً ..

ولكن الأسلوب المتبع في المكالمه كان مخيف بعض الشي ويخلي الواحد يشك في نفسه الصراحه كأنه عاملوو شي عمله مثل ما يقولون اخواننا السوريين ..

نكمل الحديث انا واختي ..

اختي : شو فيج سلامه منو متصل بلاج جي اتغير ويهج

انا : والله اتخيلي شو واحد تحت دعم سيارتي وقالولي روحي شوفي .. لا حول ولا قوه وانا ليسني منتهي <<< طبعا شدخّل الليسن انا ماكنت فالسيارة علشان ابرز ليسن ولكن من الخوف والله ماعرفت شو اقول

اختي : انزين اندوج خذي ليسني ولو قالولج شي قولي اني انا اللي اسوق مب انتي << طبعاً اختي اذكى مني مثلاً .!! بدل لا تقول لي ما يحتاج الليسن تقول لي خذي ليسني احتياط ههههههه

انا : اوكي هاتي ..

ورحت ..

مشيت بخطوات سريعة نحو سيارتي وانا حزينه من الخاطر والله

وصلت عند سيارتي وانا واصله عندي حدّها خلاص من العصبيه ولكن اتمالكت اعصابي وايد .. رحت الباركنات وشفت الولد اللي دعم سيارتي واقف هو ودورية الشرطه .. شافني الشرطي وابتسم قال لي هلا .. آمري؟

اتغير ويهي طبعا .. قلتله انا راعية السياره وانصدم وحليله ! قال والله اتحسبت حرمه كبيره راعية السياره وماشاءالله طلعتي انتي .. اختي هذا الريال دعم سيارتج وعن طريق الغلط .. ممكن ملكية واسفين على الازعاج ؟

رحت وما التفت حتى للريال اللي دعم السياره " كان شاب صغير ما يتجاوز عمره ال 22 سنة "

يبت الملكية الخاصه بالسياره وعطيتها الشرطي ووقفت انتظر .. يطالعني فهاللحظه الريال وهو متلوم مب عارف كيف يبدأ او كيف يتأسف أو أو ..

قال لي ..... أنـا آســف ....

اتغير ويهه مسكين ..

قلتله حصل خير اخويه .. مع ابتسامه خفيفه ..

وردّ علي ولكن بإبتسامة عريضه جداً ماكان يتوقع ردة فعلي الهادئه .. كان يتوقعني بقول له انته ما تشوف أو أو الخ ......

والله تم الريال يتأسف لي مليون مره وتم متلوم مني مب عارف كيف يعبّر عن اسفه ..

كسر خاطري وحليله ..

مسموح من كل قلبي مسموح ..

المهم بعد ما خططوا الحادث .. رحت وكملت شغلتنا وكأن شيئاً لم يكن وطبعا من ورا خاطري هالكلام لأنه وايد اتضايقت على سيارتي ولكن الحين الحمدلله دخلتها الوكاله وتمت فالتصليح اسبوع والحمدلله يت خفيفه .. يعني ماتأثر الموتر وايد الحمدلله ..

للحين جدامي صورة الريّال بعد ما راحوا الشرطه ناداني بإسمي

اختي سلامه ..

التفت له .. هلا؟

اختي انا آسف والله ما شفت سيارتج .. والله ..

قلتله مسموح

وراح .. ورحت ..

وكأن شيئاً لم يكن مثل ما قلت

وتوته توته خلصت الحدوته

لي عودة

أضيع بـ عآلم الذكرى ويطري بالقصيـد إنســان .. [يبه]

كتبت فـي 17-10-2010

11:09 مسـآءً ..


أكره المرض ! استغفر الله !

كتبت فـي 10-10-2010

6:02 مساءً ..


ظروفي الصحيـه هي اللي ابعدتني عن المنتدى هاليومين .. مب بس عن المنتدى .. عن الجامعه بكبرها ..

مشكلتي في مناعتي .. المناعه عندي صفـر من عشره ..

لو احد يكح عدالي .. بعد ربع ساعه انا مريضه !!

للأسف مناعتي ما تتقوى ابدا ومهما حاولت أقويها بعد ما أقدر ..

سبحانك اللهم لا إعتراض ..

من يوم الجمعه وانا على هالحاله

حمى وصلت لدرجة 40 ..

زكام غير طبيعي واحتقان

كحه متعبه

التهاب حاد فالحنجره

والحمدلله ..

رحت العياده امس ويالله يالله شليت عمري .. قالتلي الدكتوره حرارتج 40 !! يا الله ! الحين تنزلين تحت بيعطونج 3 ابر عشان تخفف عنج

وفعلا عطوني 3 ابر ولكن لا حياة لمن تنادي .. والله ما خفت الحراره غير بدرجة وحده بس لاغير .. صارت بعد مووت 39 !!

اممم الحمدلله على كل حال ..

طبعا اليوم ما رحت الجامعه والسبب الظروف الصحية السيئة جدا ..

وباجر ماعندي محاظرات الحمدلله مكنسله المحاظرات ف ما بضطر اني اروح الجامعه ..

باخذها راحه ..

اليوم شوي قدرت اشيل نفسي قبل ساعه بس ..

كنت مب قادره اكل ولا قادره حتى اتنفس الزكام عذبني ..

ادعولي الله يخليكم عسى الله يخفف عني

اللهم اشفيني انت الشافي انت المعافي
اللهم اشفيني شفاء لا يغادره سقما
اللهم أجرني .. اللهم أجرني ..
اللهم عافني .. اللهم عافني

لي عودة حبايبي

احبكم في الله ..

يوم متعب ! ~

كتبت فـي 08-10-2010

9:10 صباحاً ..

البارحه كان يومي متعب شوي ..

قمت الساعه 7 ونص على غير العاده مع اني متعوده اقوم الساعه 8 ..


صاير الوقت بدري عندي نص ساعه هههه اللي يسمعني يقول ناشه قبل بأربع ساعات مب نص ساعه

المهم ماعلينا ..

قمت سبحت ولبست ورحت الجامعه .. حضرت اول محاضره .. كانت الساعه 10 .. بس بصراحه على النشاط اللي كان فيني الصبح حسيته خمد .. وصابني نوع من الخمول فالكلاس .. يمكن من البنات .. ترى والله البنات لهن تأثير بعد على نفسية الطالبه فالكلاس .. يعني يوم اشوف عدالي وحده شويه وبتغمض من النوم وتكون على يميني وعلى يساري وحده تتثاوب شي طبيعي اني بفقد نشاطي على طول وماقدرت اتجاوب مع الدكتور طوول الكلاس ..

المهم خلص هالكلاس الساعه 11 وكلاسي الثاني الساعه 1 .. يا الله اكره البريكات الطويله .. ماعرف شوه اسوي فيهن .. اتم ملانه والله ..

تميت يالسه فالاب على النت اتصفح المواقع الالكترونية .. عشان ابعد الملل .. سبحان الله هالنت يبعد عني الملل بشكل كبير ..

المهم يوم خلص البريك ورحت الكلاس قالولي الكلاس متكنسل هههه والله اتحطمت .. قلت لو رديت البيت ارقد احسن لي ! يالسه عالفاضي .. يالله ماعليه ..

المهم روحت الساعه 1 ..وصلت البيت تغديت وحصلت اختي في ويهي ..

هلا سلامه .. شخبارج وشخبار سيارتي معاج ( لأني رحت في سيارتها هاليوم الجامعه لانه سيارتي فالوكالة بخبركم السالفه بعد شوي ) ..

قلتلها تمام الحمدلله فديتها والله هالاخت تريح لي بالي اموت فيها الله لا يحرمني منها يارب

قالتلي متى بنروح الاتصالات علشان ندفع فواتير تيلفوناتنا و ناخذ يو اس بي النت

قلتلها بس شوي اريح ونروح ..

فعلا ريحت ورحنا الاتصالات وبعدني للحين مب ناااااااايمه ..

خلصنا ورجعنا البيت الساعه 6 .. تميت يالسه وانا خلاص انود فيني رقاد غير طبيعي ..

سرت غرفتي وانا اسحب ريولي من التعب وكانت الساعه 7 ونص ..

الساعه 8 سلامه كانت تحلم ..

في سابع نوومه .. وعلى الدنيا السلام ..

ما حسيت بعمري الا الساعه 4 ونص الفجر قايمه من نومي ..

طبعا راقده بدون لحاف وبدون ما احس بنفسي ..

نشيت وانا متكسره .. مالي خلق لشي ..

قعدت في فراشي لين الساعه 5 ونص ..

اختي طرشت لي مسج .. ( انتي واعيه )!!

قلتلها هيه توني ناشه

قالتلي انا مب يايني رقاد للحين يالسه .. تعالي عندي ..

نشيت اتغسلت ورحت ايلس وياها ..

وللحين يالسه معاها

وللحديث بقيه ان شاء الله

رحلة نهآية الاسبوع مع بورآشد و أم رآشد ^^

كتبت في 03-10-2010

2:48 مساءً ..

هنا من أروقة الجـامعـة ..

أنهيت كلاسـاتي لهذا اليوم والحمدلله الكلاسات كانت خفيفه جدا

فالبريك رحت شربت كرك عشان نعدل المزاج للكلاسات الباقية

بداية الاسبوع

نشاط

حيوية

تجديد

الحياة جميلة بكل ما فيها ..

في نهاية الاسبوع اللي طاف استانست وايد وايد

غيّـرنا جو ..

رحنا صوب ام القيوين ومسافي والذيد والفجييرة

بصراحه كانت رحلة عائلية ممتعة بالدرجة الاولى

نسيت نفسي ونسيت الجامعه

نسيت كل شي وتذكرت طفولتي

تذكرت يوم كنا كل ويك اند نروح الفجيرة او الذيد او راس الخيمه

هالاماكن المريحه ..

فعلا احبها

بعيد عن الزحمه

بعيد عن الضجيج

بعيد عن كل شي ..

راحه نفسيه ..

امممم

للحين ما كلت والله احس نفسي يوعانه .. وكنت تعبانه شوي الصبح بس الحين احسن الحمدلله

الحين بروح البيييت بتغدى وبحل الواجب >> حسستكم اني فالمدرسه صح؟ ههههه


القاكم على خير

مجرد فضفضه

لي عودة

اجواء الجآمعه ..

كتبت فـي 28-09-2010

11:30 صباحاً ..

موجوده حاليـا في لابات الجامعـه

في دبليو 6 بالتحـديد ..


اللاب هادئ جدا مافيه غيـري ..

قبل نصف ساعة بالضبـط من الآن كان الضجيج غير طبيعي كالعادة في مبنى كلية الاتصال

اول ما يطلعون البنات من الكلاسات ماشاءالله عليهم تبدأ الضحكات والوناسه والسوالف

الله لا يغير عليهم صدق يحسسوني بجو الجامعة

صحيح اني ما اضحك ولا اسولف مع احد

بس احس كأني وياهم ..

توني كنت قاعدة برع اشرب كوفي واعدل مزاجي شوي ..

بريكي طويل من 11 لين 1 !!

ماعليه مع منتدايه الغالي ما فيه شي ممل ..

الجو اليوم الصبح كان خبال !

روعة ماشاءالله,,

حسيت انه الشتا بدا ..

كان الجو مغييييم جدا

كان رهيب والله

طلعت من البيت وامشي فالسياره شوي شوي علشان ما اضيع علي هالجو الفنان ههههه لا واخر شي اتأخرت عالكلاس عشر دقايق ! شو اسوي ما قدرت اقاوم


لي عوده ..

سوريآ وما أدرآك ما سوريـا !! ^^؟

كتبت فـي 15-09-2010

4:11 صباحاً ..



اشتقت للجامعه .. والحين راده لها ان شاء الله ..
احس الإجازه كانت وايد طويله .. يمكن لأني ما خذت صيفي وبديت اجازتي من تاريخ 13 شهر 5 ! ولين اليوم اجازه ..
سافرت شهر سياحه .. رجعت .. ويانا رمضان .. ويانا العيد ماشاءالله وعيّدنا ..
اطول اجازه مرت عليه فحياتي هي هذي الاجازه ..
يمكن لأني ما استغليتها بـ شيء .. بس سافرت ورجعت وماخذت كورس صيفي ولا سويت اي شيء غيّر لي حياتي ..


خيرها بغيرها ان شاء الله  ..

رحت في هالإجازه ( سـوريا ) ..
الله على سوريا وأهلها ..
اتولهت عليها !
ادري بتقولون مسرع ما اتولهتي عليها هههه بس شسوي .. تجبر الواحد يشتاق لها ..
ازدحام شوارعها .. ضجيج الهرنات .. اصوات البائعين فالسوق .. سوالف المارة في الشارع وفي الممرات .. ابتسامات الاطفال .. كلمة ( تكرمي ) من صاحب السوبرماركت .. وكلمة ( على راسي ) من صاحب المطعم .. كلامهم ينقط عسل ؛) ..

تونست فعلا في هذي السفره .. ولو انه حالتي الصحيه شوي تدهورت بسبب تغير الجو .. بداية مع الحمى ثم الكحه اللي لازمتني طول سفرتي ! ثم آلام المفاصل من المشي ! هههه حسيت انه يبي لي دار المسنين في سفرتي هذي ,, الله كريم ! !

بس هذا الشي ما منعني اني اطلع مع اني لازمت الفراش كم يوم وماقدرت اروح ولامكان .. كنت اروح السوق وما اخلي شيء فخاطري ماشاءالله عليي .. اشتريت وايد اغراض لي .. حتى خذت فستان العيد من هناك .. وايد حبيته وماقدرت اقاومه مع انه صح خربّ لي ميزانيتي بس ماعليه اهم شيء اني اشتريته وماخليت شيء فخاطري ههههه

رجعّنا ونحنا محملّين بالهدايا للأهل والاصدقاء وكانوا الاطفال هم اللي لهم نصيب الأسد من السفره هذي .. كثّرنا من ملابس الاطفال لأنها احلى شيء فالسوق وعاد انا يا حبي للأطفال فديتهم زينة الحياة الدنيا ..

اممم شوه بعد..

حبييت اكلهم وايد وايد .. هذا لأني انا اول مره اروح سوريا .. اهلي قبل راحوا بس انا ما رحت .. اكلهم يخلي الواحد يزيد عشره كيلو عاد خاصه اني انا احب الاكل الشامي .. يازينه والله !

السفره كل يوم ما تخلى من المأكولات التاليه ( الورق عنب ؛ التبولة ؛ الفتوش ؛ الحمّص ) اممممم يعت والله !

هذا بالنسبه للأكل والسوق ..

اما سالفة الاجواء فالليل بصراحه احلى اجواء نقضيها فالشقه انا واهلي .. يالسين فالبلكونه مع احلى نسمة هوى .. احلى كوب حليب دافي أو كرك أو زهورات شامية .. احلى مكسرات .. ونرتشف أكوابنا ونحنا نسولف عن اليوم كيف قضيناه وباجر كيف بنقضيه لو الله كتب لنا عمر ..

نسهر حتى ساعات الصباح الاولى .. نشوف شروق الشمس وندخل نرقد لين صلاة الظهر ونقوم بكل نشاط ياسبحان الله ! هههه سلامه وتقوم بنشاط مستحيل صح ؟ ولكن ياللعجب ! سوريا تفعل المستحيل ..

افتقدت سيارتي وايد وايد .. يمكن كانت هي اكثر شيء واحشني والله .. حتى يوم رجعت البلاد يوم شفتها حسيت اني ابي احضنها هههه شوه أسوي ؟ هذي السياره الغاليه الله يحفظها تستاهل مشاعري الجياشهّ ..

ورجعنا الامارات ووحشتنا سوريا .. و طّل علينا رمضان المبارك .. قضيناه بـ أداء العبادات ولله الحمد .. بالزيارات .. بالسوالف .. وما بقول انه التيلفزيون ماله نصيب .. بصراحه كان له نصيب ساعتين من يومي .. ..

وطاف رمضان ماشاءالله ماحسينا فيه أبد .. كان مريح جدا .. ان شاء الله دوم يكون جذي خفيف على قلوبنا ..

يا العيـد .. استانسنا فيه .. طلعنا وتمشينا وزيارات الاهل بعد ونستنا زياده .. الحمـدلله الله يديم المحبه يآرب ..

انا الحين بحط رآسي وبرقد ..
كانت مجرد فضفضه على السريع لأني مشتاقه للمنتدى موت

لي عـوده ان شاء الله .. تصبحون على خير ..

أحب المطـر .. لأنه يعطيني فرصـه للدعاء ..

كتبت فـي  01-01-2010

3:54 مساءً ..

الجو بارد ..

مكآنـي ظلام ..

الامطار برع فضيعه ..

البلكونه مفتوحه والهوا يدخل عليّـه ..

ياسـلام على هذا الجو الرائع ..

أحس اني في فيلم رعب ^^

الجـو جو روايه والله ..

توها الوالده ربي يحفظها دخلت الصاله وقالت ( أميه سـلامه .. دعاء المطر مستجاب ) ,,

خلوني ادعـي ..

الله يرحمـك يا ابـويه ..

اللهم ارحمه واغفر له .. اللهم الطف به .. اللهم نـوّر عليـه قبره ..

...

اللهم وفقـني لما يرضيـك ..

اللهم سهـّل علّي دراستـي

اللهم اجعلها سنة خيـر ..

اللهـم عوضنـي ما فقدت ..

اللهم افتـح عليّ أبواب رزقـك ..

اللهم اغفـر لي ..

اللهم ارحمـني ..

اللهم نـّور حيـاتي بدينـك ..

اللهم اجعلنـي ممن يقيـمون الصـلاه ..

اللهم اهـدني ..

اللهم احفـظ لي والدتـي ..

اللهم أطل في عمـرها ..

اللهم اجعلـها سنـد لي ..

اللهم احفـظ اخواتـي ..

اللهم اجمعنـي بمن أحب ..

اللهم وفـقّ بيننا واجمعنـا بالحلال ..

اللهم آمين ..

آمين يآرب العالمين ..

جو قاعة الإمتحآن ! لا ومتأخره بعد !

كتبت فـي 26-12-2009

12:57 مساءً ..

سلامـه هنـآ ..

امتحنـت اليوم اول امتحان .. وافتكيت منه ..

هّـم وانزاح .. كان سهل الحمدلله .. مافيه اي صعوبهـ ..

امتحاني كان الساعه 8 ونص ..

حطيت المنبه على الساعه 6 ونص .. علشان انش اتسبح واراجع شويـه واشرب لي كوب جاهي واروح الامتحان وانا مستعده ..

ولكن ...!!!

رن المنبه الساعه 6 ونص وسكرته وانا مب حاسه بنفسي ..

قمت الساعه 8 الا ربع ..

نشيت واقفه من الزيغه ..

الحق ماتلحق .. اول شي سويته بطلت الكبت وطلعتّ عباتي .. طبعا نسيت اغسل ويهي حتى .. > حتى اشعار آخر

عقب استوعبت اني انا بعدني ما تغسلت .. اتجهت للحمام - عزكم الله - بخطوات سريعه .. اتغسلت عالسريع وخلصت .. لبست عباتي .. حطيت جحال اثمد .. وطلعت ..

ركبت السياره وقلت .. ( بسم الله ، الحمدلله ، سبحان الذي سخر لنا هذا وما كنا له مقرنين ، وإنا إلى ربنا لمنقلبون ، الحمدلله الحمدلله الحمدلله ، الله أكبر الله أكبر الله أكبر ، سبحانك اللهم اني ظلمت نفسي فاغفر لي فإنه لا يغفر الذنوب إلا انت ) ..

نزّلت الهاند بريك وانطلقت الى طريق الجامعه ..

وصلت الجامعه الساعه 8 وثلث .. باقي 10 دقايق عن الامتحان .. راجعت شوي وسميت بسم الله ونزلت ..

دخلت القاعه .. كانت زحححححححمه .. يلست جدام لأنه فيني عاده اني ما احب ايلس ورا ابداً .. دايماً اللي يالسين ورا مساكين ينظن فيهم ظن السوء من الدكاتره .. لأنهم دايماً يراقبون اللي يالسين ورا مراقبه شديده .. وحليلهم والله ..

فأنا بنفسي ابعد الشك عني وايلس جدام ..

انا ادري انهم يخلونا نمتحن فالقاعات اللي تحت الارض علشان ينعدم ارسال الموبايلات ولكن منووه يقول انه ارسال الموبايل ينعدم .. كل الموبايلات ارسالهم ينعدم إلا البلاك بيري الله ياخذه ان شاء الله !!.. اكره هالموبايل بشده والله ..

خلال الامتحان .. أسمع ترن .. ترن .. ترن .. ترن << رسائل بلاك بيري السخيفه ..
سكتنا وما قلنا شي ..
رديت اسمع .. ترن .. ترن .. ترن .. ترن !!!!!

خلاص يا اختي اغلقي موبايلج وفكينا .. استلمي رسايلج بعد الامتحان ولكن لا حياة لمن تنادي ..

التفت الدكتور بعصبية .. وقال بلهجه انجليزيه حاده ( ستوب :@ بليز سويتج اوف يور موبايل فون ) !!
ولكن .. طاف !!!
ترن .. ترن .. ترن .. ترن ..!!
رد قال ( سويتج اوف يور موبايل .. هووز موبايل از ذيس ؟؟ ) ..

ردت بنت من ورا .. موبايلي انا .. خلاص خلاص بسكره ..

ياحبيبتي يعني انتي ما تعرفين انه هذا امتحان ولازم من الاول تسكرين موبايلج

الله يهديج بس ..

وعدّى الامتحان على خير ..

لي عوده ..

حبـكم على رملـة خفـوقي ,,, موآطيه ..

كتبت فـي 22-12-2009

1:18 صبآحاً ..

حبـكم على رملّـة خفـوقي موآطيـهـ ..!!



وداعية كآديـلاك ! في الطريق إلى شركة التأمين

كتبت فـي 21-12-2009

3:08 مساءً ..



قبل كم يوم .. شركة التأمين طرشو سيارة علشان تاخذ سيارتي من عند البيت ..

اتصلوا فيني : السلام عليكم اخت سلامه

انا ( بصوت مبحوح ) << طبعاً لأنهم وعوني من الرقاد : وعليكم السلام ورحمة الله

: اخت سلامه انا موجود برع مشان اشيل السيارة .. انتي بالبيت ؟

انا : هيه نعم انا فالبيت .. ثواني بس وجايه ..

نشيت من مكاني بسرعه بعكس خطواتي المتثاقله اليوميه .. ابحث عن عبايتي .. بس اتذكرت اني ما غسلت ويهي حتى ههههه .. رحت الحمام عزكم الله .. غسلت ويهي بسرعه ولبست عباتي وشيلتي وشليت سويج سيارتي السبير وطلعت ..

فتحت باب الحوش .. شفت ريال شيبه وحليله راعي الونج .. قال : اختي سلامه؟؟

قلتله هيه ..

قال لي : يا هلا فيكي .. وكمّل كلامه بلهجته الشاميه ( لا تئولي انوو انتي اللي كنتي عم بتسوئي السيارة!!! )

ضحكت وقلتله للأسف هيه انا اللي كنت اسوقها

رد : يا الله ! الف الحمدلله على سلامتك اختي !

رديت بصوت خفيف : الله يسلمك .. هذا هو المفتاح السبير اتفضل ..

خذ المفتاح واتجه عند السياره .. المهم قعدت اطالعه وانا واقفه عند باب البيت .. حسيت اني شويه وبصيح بس مسكت نفسي ..

بدا يركّب سيارتي على الونج .. واول ما ركبها .. طططططططرررررررررررااااااا ااخ !! طاحت السياره من فوق واتكسرت اكثر !!

انصدمت !! .. رد ركبها مره ثانيه وطاحت بعد !! وانا مصدووووومه !! شو السالفه !! مع انه مسكين يركبها عادي يعني مب غلط!!

حاول مره ومرتين وثلاث واربع وفي كل هالمرات الاربع كل ما يركب السياره تطيح مره ثانيه!!

ابتسمت ابتسامه حزينه وانا اقول في خاطري ( فديتها سيارتي حتى وهي متكسره ما تبا تفارقني !! )

صّد علي الريال جان يقول لي : الظاهر السياره بتحبك كتير .. مو راضيه تروح معي هههههه

المهم بعد المحاولات العديده ركّب السياره ..

ياني وقال : اختي الاوراق اعطيتيهم للشركه ؟؟

قلتله هيه عطيتهم ..

رد : معوضة ان شاء الله

رديت : يعطيك العافيه .. مع السلامه ..

راح .... وراحت سيارتي معاه ..

ونسيت انه عندي سياره وشلتها من بالي بالمره

رجعت لحياتي الطبيعيه القديمه قبل ما اشتري هالسياره ..

استخدم سيارة البيت من طراز نيسان ..

وعلى قولة اهلي ..يقولولي ( الألتيما تقول لج : مرّدك لي مردّك لي يطول الوقت أو يقصر ) !!!

فعلاً مردّك لي ..!! ههههه

بس الاختلاف جداً كبير في سواقة السياره .. احسها ثقيله عليّ مع انها وحليلها عاديه !!

المهم انها سياره اتودي وتيب ..

وتوها اتصلت فيني الوالده وهي في بيت يدتي ..

الوو .. سلامه جيف حالج اميه !

انا بخير اميه شخبارج انتي وشو مسويه ؟؟

فديتها صارلها يومين قاعده هناك .. تغير جو ^^

شكلها تبا ترجّع ايام الطفوله ههههه

كلمتها .. قالت لي يلا تعالي عندنا يلسي شربي لج كوب جاهي وجان بغيتي عقب روحي !! فديتها شكلي وحشتها ..

الحين بروح عندهم واكيد اكيد لي عوده ان شاء الله ..


شفت المـوووت !

كتبت فـي  04-12-2009

9:24 مساءً ..

الحمدلله على سـلامتي ..


شفت الموت بعيـوني ..


سويت حـادث وما اعرف كيف سويته ..

افتـرّ عليّه الموتر .. مع اني ما كنت اسرع ..

جسمي كله كدمات ورضوض ..

شفايفي انطرت .. وجبهتي بعد ..

وحالياً اتلقى العلاج ..

عين ما صلت عالنبي ..

سيارتي تكنسلت .. وحالتي ماهي حاله


ادعـولي يا اغلى اخوان واخوات ..

ادعولي تراني اختكم ..

سـلامه ..









الله لا يعود هاليوم ..

نبع الغـلا عنـدك وعنـدي مصبّه ..

كتبـت في 06-11-2009

12:50 مساءً ..



والله انـك شاعر يابـن فطيـس .. !!!



والله لولآ الخوف من ربي وكرهي للذنوب .. كان اقول ان التراب ابعد عليك من النجـوم !!!

كتبت فـي 02-11-2009

11:40 صباحاً ..

ها قـد عـدت ..

فيني ضيـق ..

سبحان مغيـّر الأحوال ..
 
 
11:47 صباحاً ..
 
والله لولا الخوف من ربي وكرهي للذنوب

كان اقول ان التراب ابعد عليك من النجوم

يا إلهي تطمئن بذكرك أرواح القلوب

لا اله الا انت نسجد له ولاغيره يدوم

وجهك الباقي وعبدك ينتظر منك المكتوب

ماله الا ماكتبت مايطول الا المقسوم


ياالعظيم يااللي في علمك جنه ونار وغيوم

تنجي أبوي من عذاب النار والقبر الكتوم

يالعظيم يالعظيم...

يبه يبه..

الله اللي يعلم يوم اودعك مغصوب..

يوم احطك في القبر مدري اقوم او مااقوم

ماهقيت امشي ولاخطوه ولاالحق بروق

من عرفت ان الفراق بيوم صار امره محسوم

صارت الدنيا تدور ولاعرفت الدرب نوب

مثل الاعمى صرت يبه.. ماعلّي شرهه ولوم

الوكاد اني غديت بصوب والدنيا في صوب

والحياة الله يجيرك صارت اقسى من اللزوم

كل مااذكرك يبه ينحرق شمع ويذوب

يختنق صدرالمفارق كثر ماصار محروم

اذكرك وانت هنا وهناك يصعب الهروب

وين ماأناظر اشوفك في عيوني كل يوم

اتخيل طـّلتك ومشيتك في هالدروب

حتى صوتك اسمعه نفس السوالف يارحوم

صار بيتي في عيوني موحش وكله عيوب


من رحلت لاخبر لاعلم ولاعين تنوم

ما بقى للبيت نور ومابقى للجرح ثوب

لابقى الا ذكريات بيني وبينك تدوم

يبه الله لايعاقبني ولاكني اتوب

ليت ربي ماخلق فرقى ولا موت وهموم


والله لولا الخوف من ربي وكرهي للذنوب

كان اقول ان التراب ابعد عليك من النجوم


[الله يرحمـك يابـويه]

أحب جـوّي ] ..~

كتبت فـي 02-11-2009

10:14 صباحاً ..

صبـاحكم خيـر ..
صبـاحكم ورد ..

صبـاحكم حب ..

مع انه دوامي يبدأ الساعه 2 الظهر .. بس ماعرف شوه اللي وعاني الساعه 8 وربع .. اكيد لأني تعودت على روتين نشة الصبح..فـ دايما يوم يكون دوامي الظهر اقوم الصبح

تميت احاول ارد ارقد ولكن بلا جدوى .. مافيه فايده .. قعدت فالفراش لين الساعه 9 .. محاولة مني للخلود للنوم ..!! ولكن لا حياة لمن تنادي !!..

قمت .. اتسبحت .. سويت لي كوب كوفي علشان اعدّل مزاجي شويه عالصبح .. وفتحت منتداي الغالي .. منتدى طلبة جامعة الشارقة .. عمري ما حبيت منتدى كثر ما حبيت هالمنتدى .. احس انه كلنا على قلب واحد .. صح اني ماعرف اللي فالمنتدى الا بينا علاقات سطحية تتمثل في الردود والمواضيع ولكن شيء ما يجذبني لهم .. ماعرف شو هو هالشي ..


حالياً .. كوب الكوفي بإيد .. واكتب بإيد ..

الله كم احب هذا الشعور ..


اشعة الشمس تتسلل إلى غرفة الجلوس ..
دفء رائع ..
قهوة لذيذه ..
منتدى غالي ..
جهاز نقال صامت ..

جو لا يوصف .......

علشان جيه احب انش الصبح ^^ اتوقع يعني ..

الظهر بقوم ببدل ملابسي وبروح احضر محاظراتي .. وعقب بوافيكم باللي صار معايه ..

عسى خير ..

لي عوده ..