الأربعاء، 19 يناير، 2011

غريبـه !

غريبه الدنيا والله

تلاقي الشخص اليوم معاك يضحك ويسولف وتتبادلون الاحاديث والمواضيع

فجأه ..

يغيب عنك

لا حس ولا خبر

ويوم تسأل عنه وتحاتيه

وينه وينه ؟؟

يقولولك مآت !

ياهي غريبه هالدنيا

مافي اي مجال للزعل او للضيق

المفروض الواحد يعيش حياته مع اللي يحبهم ويحبونه بدون اي ضيق او زعل او تكدير خاطر

الواحد ما يعرف متى بيفارق هذي الدنيا الـدنيّـه !..

الله يرحم جميع موتانا

الله يرحمك ابويه ..

الله يرحمك عمرآن ..

الله يرحمك عمّـي

الله يرحمـج عمتي ..

اللهم ارحم جميع اموات المسلمين واشفي مرضاهم ..

اللهم امين

لازم نعيش حياتنا وما نخلي شي يأثر علينا

بعد لا اعتراض على حكم الله

كل انسان بيومه و بساعته

الله يرحمهم اجمعين ..

الجمعة، 14 يناير، 2011

تم ..

تم بحمد الله ^^

نقلت كل ما كتبتـه من بوح في منتدى جامعتي إلى مدونتي الخآصه ..

اتمنى لكم متآبعة سعيـدة

موقف مضحك ويفشّـل هههههه

كتبت فـي 21-10-2010

12:11 مساءً ..

صارلي موقف ايضحك قبل شويه في الكلاس ..



طلب مني الدكتور اني اسير اييب الرمونت مال البروجكتر وطبعاً اتوهقت البطله سـلامه ..


لأنه ولا مره فحياتي احد طلب مني اني اييب الرمونت وطبعاً طبعاً انا ماعرف من وين اييبونه ..

قلتله اوكي وانا اضحك وطلعت من الكلاس ولا ادري شو السالفه



نزلت تحت شفت بنات قاعدات ورحتلهن .. قلتلهن بكل عفويه ( بنات النجده ابا الرمونت مال البروجكتر من وين اييبه !! ) ضحكوا قالولي روحي هالمكتب من عندها الرمونت .. قلتلهم اوكي وانطلقت اركض وسبحان الله انه هاليوم هو اليوم الوحيد اللي البس فيه كعب من سنة الف ما لبست كعب فالجامعه !!


رحت المكتب قلتلها السلام عليكم ممكن الرمونت ؟ قالتلي حبيبتي اي قاعه انتي ؟قلتلها 101 ! قالتلي عشان ما تتعبين نفسج تركبين وتنزلين تركبين وتنزلين روحي مكتب مجد فوق بتعطيج احسن .. لونه اسود مثل هذا .. قلتلها اوكي ..رحت عند المكتب اللي فوق وماكان فيه حد .. اترييت دقيقتين ثلاث ويت .. قلتلها السلام عليكم ممكن الرمونت .. قالتلي اوكي شغلي ورديه الله يخليج .. قلتلها اوكي ..


خذت الرمونت ورررركض على الكلاس .. وصلت وبطلت الباب قلت : اسفه ماكانت موجوده .. جان يبتسم لي الدكتور وهو فيه ضحكه والبروجكتر شغّال .. لا تسألوني كيف شغلوه .. شكلهم ملّوا وهم يتريوني .. جان يطلع مني صوت عفوي ( أه !! شغلتوه ) هههههههه


ورحت رديت الرمونت وقلتلها وبكل أسى !! شغلوه !!


هههههه ورجعت الكلاس مره ثانيه وكان الله غفوراً رحيماً ..


فلو سمحتوا يالدكاتره لا تطرشوني مره ثانيه لأني ما أدل ...ههههههه


لي عوده..

حضرتك مآتشوف ؟

كتبت فـي  17-10-2010

11:49 مسـآءً ..

بما أنه الشتا بدا يدخل علينا وبدينا نحس بالوقت فليل يمر ابطأ من البطيء ..

انا بديت أمـلّ !

ولكن اموت في ايام الشتا وبطئها ..

انزين خلوني افضفض ..

ذاك اليوم كتبت وقلتلكم بخبركم عن السالفه اللي صارت لي عن سيارتي ..

كنت رايحه هذاك اليوم العربي سنتر ويا اختي رايحين نخلص شغلة فالاتصالات اللي هناك ..

دخلت الاتصالات .. قعدت عالكرسي وبدينا نتكلم مع الموظف عن الشغله اللي محتاجينها وكل الامور على ما يرام ..

شوي رن موبايلي رقم غريب يبدأ بـ 04 وكله ستّـات 666!,.!!

من يا ترى ..

انا : يا الله ما اداني ارد على ارقام غريبه

اختي : سوسو منو متصل فيج ؟

انا : والله ما ادري رقم غريب وصفر اربعه مادري منو لا ومرتب بعد ياسلام

اختي : انزين ردي شوفي منو يمكن حد يباج او في شي ضروري

انا : لا والله ليش انا كونزاليزارايس ! << مادري اذا صح جي اسمها او لا

اختي : لا ياحبيبتي اهم منها .. ردي شوفي منو

انا : اففف امري لله ..

والمكالمه كالتالي : ....

الوه ؟؟!!

السلام عليكم اخت سلامه ..

انا وبكل دهشه !!! وعليكم السلام والرحمه هلا ؟؟

معاج العمليات شرطة دبي

( صاعقه طبعا ..! )

هلا اخوي شو في !!!! << خفت كأني مسويه جريمه

انتي حاليا موجوده في العربي سنتر صحيح ؟

هيه موجوده خير ان شاء الله ؟

كل خير اختي لا تخافين .. بس فيه واحد دعم سيارتج وهو الحين موجود فالباركنات ..

مع السلامه

اوكي فمان الله ..


طبعا الخبر كان كالصاعقه ههههه نظراً لمحبتي الكبيرة لهذي السيارة الغاليه على قلبي جداً ..

ولكن الأسلوب المتبع في المكالمه كان مخيف بعض الشي ويخلي الواحد يشك في نفسه الصراحه كأنه عاملوو شي عمله مثل ما يقولون اخواننا السوريين ..

نكمل الحديث انا واختي ..

اختي : شو فيج سلامه منو متصل بلاج جي اتغير ويهج

انا : والله اتخيلي شو واحد تحت دعم سيارتي وقالولي روحي شوفي .. لا حول ولا قوه وانا ليسني منتهي <<< طبعا شدخّل الليسن انا ماكنت فالسيارة علشان ابرز ليسن ولكن من الخوف والله ماعرفت شو اقول

اختي : انزين اندوج خذي ليسني ولو قالولج شي قولي اني انا اللي اسوق مب انتي << طبعاً اختي اذكى مني مثلاً .!! بدل لا تقول لي ما يحتاج الليسن تقول لي خذي ليسني احتياط ههههههه

انا : اوكي هاتي ..

ورحت ..

مشيت بخطوات سريعة نحو سيارتي وانا حزينه من الخاطر والله

وصلت عند سيارتي وانا واصله عندي حدّها خلاص من العصبيه ولكن اتمالكت اعصابي وايد .. رحت الباركنات وشفت الولد اللي دعم سيارتي واقف هو ودورية الشرطه .. شافني الشرطي وابتسم قال لي هلا .. آمري؟

اتغير ويهي طبعا .. قلتله انا راعية السياره وانصدم وحليله ! قال والله اتحسبت حرمه كبيره راعية السياره وماشاءالله طلعتي انتي .. اختي هذا الريال دعم سيارتج وعن طريق الغلط .. ممكن ملكية واسفين على الازعاج ؟

رحت وما التفت حتى للريال اللي دعم السياره " كان شاب صغير ما يتجاوز عمره ال 22 سنة "

يبت الملكية الخاصه بالسياره وعطيتها الشرطي ووقفت انتظر .. يطالعني فهاللحظه الريال وهو متلوم مب عارف كيف يبدأ او كيف يتأسف أو أو ..

قال لي ..... أنـا آســف ....

اتغير ويهه مسكين ..

قلتله حصل خير اخويه .. مع ابتسامه خفيفه ..

وردّ علي ولكن بإبتسامة عريضه جداً ماكان يتوقع ردة فعلي الهادئه .. كان يتوقعني بقول له انته ما تشوف أو أو الخ ......

والله تم الريال يتأسف لي مليون مره وتم متلوم مني مب عارف كيف يعبّر عن اسفه ..

كسر خاطري وحليله ..

مسموح من كل قلبي مسموح ..

المهم بعد ما خططوا الحادث .. رحت وكملت شغلتنا وكأن شيئاً لم يكن وطبعا من ورا خاطري هالكلام لأنه وايد اتضايقت على سيارتي ولكن الحين الحمدلله دخلتها الوكاله وتمت فالتصليح اسبوع والحمدلله يت خفيفه .. يعني ماتأثر الموتر وايد الحمدلله ..

للحين جدامي صورة الريّال بعد ما راحوا الشرطه ناداني بإسمي

اختي سلامه ..

التفت له .. هلا؟

اختي انا آسف والله ما شفت سيارتج .. والله ..

قلتله مسموح

وراح .. ورحت ..

وكأن شيئاً لم يكن مثل ما قلت

وتوته توته خلصت الحدوته

لي عودة

أضيع بـ عآلم الذكرى ويطري بالقصيـد إنســان .. [يبه]

كتبت فـي 17-10-2010

11:09 مسـآءً ..


أكره المرض ! استغفر الله !

كتبت فـي 10-10-2010

6:02 مساءً ..


ظروفي الصحيـه هي اللي ابعدتني عن المنتدى هاليومين .. مب بس عن المنتدى .. عن الجامعه بكبرها ..

مشكلتي في مناعتي .. المناعه عندي صفـر من عشره ..

لو احد يكح عدالي .. بعد ربع ساعه انا مريضه !!

للأسف مناعتي ما تتقوى ابدا ومهما حاولت أقويها بعد ما أقدر ..

سبحانك اللهم لا إعتراض ..

من يوم الجمعه وانا على هالحاله

حمى وصلت لدرجة 40 ..

زكام غير طبيعي واحتقان

كحه متعبه

التهاب حاد فالحنجره

والحمدلله ..

رحت العياده امس ويالله يالله شليت عمري .. قالتلي الدكتوره حرارتج 40 !! يا الله ! الحين تنزلين تحت بيعطونج 3 ابر عشان تخفف عنج

وفعلا عطوني 3 ابر ولكن لا حياة لمن تنادي .. والله ما خفت الحراره غير بدرجة وحده بس لاغير .. صارت بعد مووت 39 !!

اممم الحمدلله على كل حال ..

طبعا اليوم ما رحت الجامعه والسبب الظروف الصحية السيئة جدا ..

وباجر ماعندي محاظرات الحمدلله مكنسله المحاظرات ف ما بضطر اني اروح الجامعه ..

باخذها راحه ..

اليوم شوي قدرت اشيل نفسي قبل ساعه بس ..

كنت مب قادره اكل ولا قادره حتى اتنفس الزكام عذبني ..

ادعولي الله يخليكم عسى الله يخفف عني

اللهم اشفيني انت الشافي انت المعافي
اللهم اشفيني شفاء لا يغادره سقما
اللهم أجرني .. اللهم أجرني ..
اللهم عافني .. اللهم عافني

لي عودة حبايبي

احبكم في الله ..

يوم متعب ! ~

كتبت فـي 08-10-2010

9:10 صباحاً ..

البارحه كان يومي متعب شوي ..

قمت الساعه 7 ونص على غير العاده مع اني متعوده اقوم الساعه 8 ..


صاير الوقت بدري عندي نص ساعه هههه اللي يسمعني يقول ناشه قبل بأربع ساعات مب نص ساعه

المهم ماعلينا ..

قمت سبحت ولبست ورحت الجامعه .. حضرت اول محاضره .. كانت الساعه 10 .. بس بصراحه على النشاط اللي كان فيني الصبح حسيته خمد .. وصابني نوع من الخمول فالكلاس .. يمكن من البنات .. ترى والله البنات لهن تأثير بعد على نفسية الطالبه فالكلاس .. يعني يوم اشوف عدالي وحده شويه وبتغمض من النوم وتكون على يميني وعلى يساري وحده تتثاوب شي طبيعي اني بفقد نشاطي على طول وماقدرت اتجاوب مع الدكتور طوول الكلاس ..

المهم خلص هالكلاس الساعه 11 وكلاسي الثاني الساعه 1 .. يا الله اكره البريكات الطويله .. ماعرف شوه اسوي فيهن .. اتم ملانه والله ..

تميت يالسه فالاب على النت اتصفح المواقع الالكترونية .. عشان ابعد الملل .. سبحان الله هالنت يبعد عني الملل بشكل كبير ..

المهم يوم خلص البريك ورحت الكلاس قالولي الكلاس متكنسل هههه والله اتحطمت .. قلت لو رديت البيت ارقد احسن لي ! يالسه عالفاضي .. يالله ماعليه ..

المهم روحت الساعه 1 ..وصلت البيت تغديت وحصلت اختي في ويهي ..

هلا سلامه .. شخبارج وشخبار سيارتي معاج ( لأني رحت في سيارتها هاليوم الجامعه لانه سيارتي فالوكالة بخبركم السالفه بعد شوي ) ..

قلتلها تمام الحمدلله فديتها والله هالاخت تريح لي بالي اموت فيها الله لا يحرمني منها يارب

قالتلي متى بنروح الاتصالات علشان ندفع فواتير تيلفوناتنا و ناخذ يو اس بي النت

قلتلها بس شوي اريح ونروح ..

فعلا ريحت ورحنا الاتصالات وبعدني للحين مب ناااااااايمه ..

خلصنا ورجعنا البيت الساعه 6 .. تميت يالسه وانا خلاص انود فيني رقاد غير طبيعي ..

سرت غرفتي وانا اسحب ريولي من التعب وكانت الساعه 7 ونص ..

الساعه 8 سلامه كانت تحلم ..

في سابع نوومه .. وعلى الدنيا السلام ..

ما حسيت بعمري الا الساعه 4 ونص الفجر قايمه من نومي ..

طبعا راقده بدون لحاف وبدون ما احس بنفسي ..

نشيت وانا متكسره .. مالي خلق لشي ..

قعدت في فراشي لين الساعه 5 ونص ..

اختي طرشت لي مسج .. ( انتي واعيه )!!

قلتلها هيه توني ناشه

قالتلي انا مب يايني رقاد للحين يالسه .. تعالي عندي ..

نشيت اتغسلت ورحت ايلس وياها ..

وللحين يالسه معاها

وللحديث بقيه ان شاء الله

رحلة نهآية الاسبوع مع بورآشد و أم رآشد ^^

كتبت في 03-10-2010

2:48 مساءً ..

هنا من أروقة الجـامعـة ..

أنهيت كلاسـاتي لهذا اليوم والحمدلله الكلاسات كانت خفيفه جدا

فالبريك رحت شربت كرك عشان نعدل المزاج للكلاسات الباقية

بداية الاسبوع

نشاط

حيوية

تجديد

الحياة جميلة بكل ما فيها ..

في نهاية الاسبوع اللي طاف استانست وايد وايد

غيّـرنا جو ..

رحنا صوب ام القيوين ومسافي والذيد والفجييرة

بصراحه كانت رحلة عائلية ممتعة بالدرجة الاولى

نسيت نفسي ونسيت الجامعه

نسيت كل شي وتذكرت طفولتي

تذكرت يوم كنا كل ويك اند نروح الفجيرة او الذيد او راس الخيمه

هالاماكن المريحه ..

فعلا احبها

بعيد عن الزحمه

بعيد عن الضجيج

بعيد عن كل شي ..

راحه نفسيه ..

امممم

للحين ما كلت والله احس نفسي يوعانه .. وكنت تعبانه شوي الصبح بس الحين احسن الحمدلله

الحين بروح البيييت بتغدى وبحل الواجب >> حسستكم اني فالمدرسه صح؟ ههههه


القاكم على خير

مجرد فضفضه

لي عودة

اجواء الجآمعه ..

كتبت فـي 28-09-2010

11:30 صباحاً ..

موجوده حاليـا في لابات الجامعـه

في دبليو 6 بالتحـديد ..


اللاب هادئ جدا مافيه غيـري ..

قبل نصف ساعة بالضبـط من الآن كان الضجيج غير طبيعي كالعادة في مبنى كلية الاتصال

اول ما يطلعون البنات من الكلاسات ماشاءالله عليهم تبدأ الضحكات والوناسه والسوالف

الله لا يغير عليهم صدق يحسسوني بجو الجامعة

صحيح اني ما اضحك ولا اسولف مع احد

بس احس كأني وياهم ..

توني كنت قاعدة برع اشرب كوفي واعدل مزاجي شوي ..

بريكي طويل من 11 لين 1 !!

ماعليه مع منتدايه الغالي ما فيه شي ممل ..

الجو اليوم الصبح كان خبال !

روعة ماشاءالله,,

حسيت انه الشتا بدا ..

كان الجو مغييييم جدا

كان رهيب والله

طلعت من البيت وامشي فالسياره شوي شوي علشان ما اضيع علي هالجو الفنان ههههه لا واخر شي اتأخرت عالكلاس عشر دقايق ! شو اسوي ما قدرت اقاوم


لي عوده ..

سوريآ وما أدرآك ما سوريـا !! ^^؟

كتبت فـي 15-09-2010

4:11 صباحاً ..



اشتقت للجامعه .. والحين راده لها ان شاء الله ..
احس الإجازه كانت وايد طويله .. يمكن لأني ما خذت صيفي وبديت اجازتي من تاريخ 13 شهر 5 ! ولين اليوم اجازه ..
سافرت شهر سياحه .. رجعت .. ويانا رمضان .. ويانا العيد ماشاءالله وعيّدنا ..
اطول اجازه مرت عليه فحياتي هي هذي الاجازه ..
يمكن لأني ما استغليتها بـ شيء .. بس سافرت ورجعت وماخذت كورس صيفي ولا سويت اي شيء غيّر لي حياتي ..


خيرها بغيرها ان شاء الله  ..

رحت في هالإجازه ( سـوريا ) ..
الله على سوريا وأهلها ..
اتولهت عليها !
ادري بتقولون مسرع ما اتولهتي عليها هههه بس شسوي .. تجبر الواحد يشتاق لها ..
ازدحام شوارعها .. ضجيج الهرنات .. اصوات البائعين فالسوق .. سوالف المارة في الشارع وفي الممرات .. ابتسامات الاطفال .. كلمة ( تكرمي ) من صاحب السوبرماركت .. وكلمة ( على راسي ) من صاحب المطعم .. كلامهم ينقط عسل ؛) ..

تونست فعلا في هذي السفره .. ولو انه حالتي الصحيه شوي تدهورت بسبب تغير الجو .. بداية مع الحمى ثم الكحه اللي لازمتني طول سفرتي ! ثم آلام المفاصل من المشي ! هههه حسيت انه يبي لي دار المسنين في سفرتي هذي ,, الله كريم ! !

بس هذا الشي ما منعني اني اطلع مع اني لازمت الفراش كم يوم وماقدرت اروح ولامكان .. كنت اروح السوق وما اخلي شيء فخاطري ماشاءالله عليي .. اشتريت وايد اغراض لي .. حتى خذت فستان العيد من هناك .. وايد حبيته وماقدرت اقاومه مع انه صح خربّ لي ميزانيتي بس ماعليه اهم شيء اني اشتريته وماخليت شيء فخاطري ههههه

رجعّنا ونحنا محملّين بالهدايا للأهل والاصدقاء وكانوا الاطفال هم اللي لهم نصيب الأسد من السفره هذي .. كثّرنا من ملابس الاطفال لأنها احلى شيء فالسوق وعاد انا يا حبي للأطفال فديتهم زينة الحياة الدنيا ..

اممم شوه بعد..

حبييت اكلهم وايد وايد .. هذا لأني انا اول مره اروح سوريا .. اهلي قبل راحوا بس انا ما رحت .. اكلهم يخلي الواحد يزيد عشره كيلو عاد خاصه اني انا احب الاكل الشامي .. يازينه والله !

السفره كل يوم ما تخلى من المأكولات التاليه ( الورق عنب ؛ التبولة ؛ الفتوش ؛ الحمّص ) اممممم يعت والله !

هذا بالنسبه للأكل والسوق ..

اما سالفة الاجواء فالليل بصراحه احلى اجواء نقضيها فالشقه انا واهلي .. يالسين فالبلكونه مع احلى نسمة هوى .. احلى كوب حليب دافي أو كرك أو زهورات شامية .. احلى مكسرات .. ونرتشف أكوابنا ونحنا نسولف عن اليوم كيف قضيناه وباجر كيف بنقضيه لو الله كتب لنا عمر ..

نسهر حتى ساعات الصباح الاولى .. نشوف شروق الشمس وندخل نرقد لين صلاة الظهر ونقوم بكل نشاط ياسبحان الله ! هههه سلامه وتقوم بنشاط مستحيل صح ؟ ولكن ياللعجب ! سوريا تفعل المستحيل ..

افتقدت سيارتي وايد وايد .. يمكن كانت هي اكثر شيء واحشني والله .. حتى يوم رجعت البلاد يوم شفتها حسيت اني ابي احضنها هههه شوه أسوي ؟ هذي السياره الغاليه الله يحفظها تستاهل مشاعري الجياشهّ ..

ورجعنا الامارات ووحشتنا سوريا .. و طّل علينا رمضان المبارك .. قضيناه بـ أداء العبادات ولله الحمد .. بالزيارات .. بالسوالف .. وما بقول انه التيلفزيون ماله نصيب .. بصراحه كان له نصيب ساعتين من يومي .. ..

وطاف رمضان ماشاءالله ماحسينا فيه أبد .. كان مريح جدا .. ان شاء الله دوم يكون جذي خفيف على قلوبنا ..

يا العيـد .. استانسنا فيه .. طلعنا وتمشينا وزيارات الاهل بعد ونستنا زياده .. الحمـدلله الله يديم المحبه يآرب ..

انا الحين بحط رآسي وبرقد ..
كانت مجرد فضفضه على السريع لأني مشتاقه للمنتدى موت

لي عـوده ان شاء الله .. تصبحون على خير ..

أحب المطـر .. لأنه يعطيني فرصـه للدعاء ..

كتبت فـي  01-01-2010

3:54 مساءً ..

الجو بارد ..

مكآنـي ظلام ..

الامطار برع فضيعه ..

البلكونه مفتوحه والهوا يدخل عليّـه ..

ياسـلام على هذا الجو الرائع ..

أحس اني في فيلم رعب ^^

الجـو جو روايه والله ..

توها الوالده ربي يحفظها دخلت الصاله وقالت ( أميه سـلامه .. دعاء المطر مستجاب ) ,,

خلوني ادعـي ..

الله يرحمـك يا ابـويه ..

اللهم ارحمه واغفر له .. اللهم الطف به .. اللهم نـوّر عليـه قبره ..

...

اللهم وفقـني لما يرضيـك ..

اللهم سهـّل علّي دراستـي

اللهم اجعلها سنة خيـر ..

اللهـم عوضنـي ما فقدت ..

اللهم افتـح عليّ أبواب رزقـك ..

اللهم اغفـر لي ..

اللهم ارحمـني ..

اللهم نـّور حيـاتي بدينـك ..

اللهم اجعلنـي ممن يقيـمون الصـلاه ..

اللهم اهـدني ..

اللهم احفـظ لي والدتـي ..

اللهم أطل في عمـرها ..

اللهم اجعلـها سنـد لي ..

اللهم احفـظ اخواتـي ..

اللهم اجمعنـي بمن أحب ..

اللهم وفـقّ بيننا واجمعنـا بالحلال ..

اللهم آمين ..

آمين يآرب العالمين ..

جو قاعة الإمتحآن ! لا ومتأخره بعد !

كتبت فـي 26-12-2009

12:57 مساءً ..

سلامـه هنـآ ..

امتحنـت اليوم اول امتحان .. وافتكيت منه ..

هّـم وانزاح .. كان سهل الحمدلله .. مافيه اي صعوبهـ ..

امتحاني كان الساعه 8 ونص ..

حطيت المنبه على الساعه 6 ونص .. علشان انش اتسبح واراجع شويـه واشرب لي كوب جاهي واروح الامتحان وانا مستعده ..

ولكن ...!!!

رن المنبه الساعه 6 ونص وسكرته وانا مب حاسه بنفسي ..

قمت الساعه 8 الا ربع ..

نشيت واقفه من الزيغه ..

الحق ماتلحق .. اول شي سويته بطلت الكبت وطلعتّ عباتي .. طبعا نسيت اغسل ويهي حتى .. > حتى اشعار آخر

عقب استوعبت اني انا بعدني ما تغسلت .. اتجهت للحمام - عزكم الله - بخطوات سريعه .. اتغسلت عالسريع وخلصت .. لبست عباتي .. حطيت جحال اثمد .. وطلعت ..

ركبت السياره وقلت .. ( بسم الله ، الحمدلله ، سبحان الذي سخر لنا هذا وما كنا له مقرنين ، وإنا إلى ربنا لمنقلبون ، الحمدلله الحمدلله الحمدلله ، الله أكبر الله أكبر الله أكبر ، سبحانك اللهم اني ظلمت نفسي فاغفر لي فإنه لا يغفر الذنوب إلا انت ) ..

نزّلت الهاند بريك وانطلقت الى طريق الجامعه ..

وصلت الجامعه الساعه 8 وثلث .. باقي 10 دقايق عن الامتحان .. راجعت شوي وسميت بسم الله ونزلت ..

دخلت القاعه .. كانت زحححححححمه .. يلست جدام لأنه فيني عاده اني ما احب ايلس ورا ابداً .. دايماً اللي يالسين ورا مساكين ينظن فيهم ظن السوء من الدكاتره .. لأنهم دايماً يراقبون اللي يالسين ورا مراقبه شديده .. وحليلهم والله ..

فأنا بنفسي ابعد الشك عني وايلس جدام ..

انا ادري انهم يخلونا نمتحن فالقاعات اللي تحت الارض علشان ينعدم ارسال الموبايلات ولكن منووه يقول انه ارسال الموبايل ينعدم .. كل الموبايلات ارسالهم ينعدم إلا البلاك بيري الله ياخذه ان شاء الله !!.. اكره هالموبايل بشده والله ..

خلال الامتحان .. أسمع ترن .. ترن .. ترن .. ترن << رسائل بلاك بيري السخيفه ..
سكتنا وما قلنا شي ..
رديت اسمع .. ترن .. ترن .. ترن .. ترن !!!!!

خلاص يا اختي اغلقي موبايلج وفكينا .. استلمي رسايلج بعد الامتحان ولكن لا حياة لمن تنادي ..

التفت الدكتور بعصبية .. وقال بلهجه انجليزيه حاده ( ستوب :@ بليز سويتج اوف يور موبايل فون ) !!
ولكن .. طاف !!!
ترن .. ترن .. ترن .. ترن ..!!
رد قال ( سويتج اوف يور موبايل .. هووز موبايل از ذيس ؟؟ ) ..

ردت بنت من ورا .. موبايلي انا .. خلاص خلاص بسكره ..

ياحبيبتي يعني انتي ما تعرفين انه هذا امتحان ولازم من الاول تسكرين موبايلج

الله يهديج بس ..

وعدّى الامتحان على خير ..

لي عوده ..

حبـكم على رملـة خفـوقي ,,, موآطيه ..

كتبت فـي 22-12-2009

1:18 صبآحاً ..

حبـكم على رملّـة خفـوقي موآطيـهـ ..!!



وداعية كآديـلاك ! في الطريق إلى شركة التأمين

كتبت فـي 21-12-2009

3:08 مساءً ..



قبل كم يوم .. شركة التأمين طرشو سيارة علشان تاخذ سيارتي من عند البيت ..

اتصلوا فيني : السلام عليكم اخت سلامه

انا ( بصوت مبحوح ) << طبعاً لأنهم وعوني من الرقاد : وعليكم السلام ورحمة الله

: اخت سلامه انا موجود برع مشان اشيل السيارة .. انتي بالبيت ؟

انا : هيه نعم انا فالبيت .. ثواني بس وجايه ..

نشيت من مكاني بسرعه بعكس خطواتي المتثاقله اليوميه .. ابحث عن عبايتي .. بس اتذكرت اني ما غسلت ويهي حتى ههههه .. رحت الحمام عزكم الله .. غسلت ويهي بسرعه ولبست عباتي وشيلتي وشليت سويج سيارتي السبير وطلعت ..

فتحت باب الحوش .. شفت ريال شيبه وحليله راعي الونج .. قال : اختي سلامه؟؟

قلتله هيه ..

قال لي : يا هلا فيكي .. وكمّل كلامه بلهجته الشاميه ( لا تئولي انوو انتي اللي كنتي عم بتسوئي السيارة!!! )

ضحكت وقلتله للأسف هيه انا اللي كنت اسوقها

رد : يا الله ! الف الحمدلله على سلامتك اختي !

رديت بصوت خفيف : الله يسلمك .. هذا هو المفتاح السبير اتفضل ..

خذ المفتاح واتجه عند السياره .. المهم قعدت اطالعه وانا واقفه عند باب البيت .. حسيت اني شويه وبصيح بس مسكت نفسي ..

بدا يركّب سيارتي على الونج .. واول ما ركبها .. طططططططرررررررررررااااااا ااخ !! طاحت السياره من فوق واتكسرت اكثر !!

انصدمت !! .. رد ركبها مره ثانيه وطاحت بعد !! وانا مصدووووومه !! شو السالفه !! مع انه مسكين يركبها عادي يعني مب غلط!!

حاول مره ومرتين وثلاث واربع وفي كل هالمرات الاربع كل ما يركب السياره تطيح مره ثانيه!!

ابتسمت ابتسامه حزينه وانا اقول في خاطري ( فديتها سيارتي حتى وهي متكسره ما تبا تفارقني !! )

صّد علي الريال جان يقول لي : الظاهر السياره بتحبك كتير .. مو راضيه تروح معي هههههه

المهم بعد المحاولات العديده ركّب السياره ..

ياني وقال : اختي الاوراق اعطيتيهم للشركه ؟؟

قلتله هيه عطيتهم ..

رد : معوضة ان شاء الله

رديت : يعطيك العافيه .. مع السلامه ..

راح .... وراحت سيارتي معاه ..

ونسيت انه عندي سياره وشلتها من بالي بالمره

رجعت لحياتي الطبيعيه القديمه قبل ما اشتري هالسياره ..

استخدم سيارة البيت من طراز نيسان ..

وعلى قولة اهلي ..يقولولي ( الألتيما تقول لج : مرّدك لي مردّك لي يطول الوقت أو يقصر ) !!!

فعلاً مردّك لي ..!! ههههه

بس الاختلاف جداً كبير في سواقة السياره .. احسها ثقيله عليّ مع انها وحليلها عاديه !!

المهم انها سياره اتودي وتيب ..

وتوها اتصلت فيني الوالده وهي في بيت يدتي ..

الوو .. سلامه جيف حالج اميه !

انا بخير اميه شخبارج انتي وشو مسويه ؟؟

فديتها صارلها يومين قاعده هناك .. تغير جو ^^

شكلها تبا ترجّع ايام الطفوله ههههه

كلمتها .. قالت لي يلا تعالي عندنا يلسي شربي لج كوب جاهي وجان بغيتي عقب روحي !! فديتها شكلي وحشتها ..

الحين بروح عندهم واكيد اكيد لي عوده ان شاء الله ..


شفت المـوووت !

كتبت فـي  04-12-2009

9:24 مساءً ..

الحمدلله على سـلامتي ..


شفت الموت بعيـوني ..


سويت حـادث وما اعرف كيف سويته ..

افتـرّ عليّه الموتر .. مع اني ما كنت اسرع ..

جسمي كله كدمات ورضوض ..

شفايفي انطرت .. وجبهتي بعد ..

وحالياً اتلقى العلاج ..

عين ما صلت عالنبي ..

سيارتي تكنسلت .. وحالتي ماهي حاله


ادعـولي يا اغلى اخوان واخوات ..

ادعولي تراني اختكم ..

سـلامه ..









الله لا يعود هاليوم ..

نبع الغـلا عنـدك وعنـدي مصبّه ..

كتبـت في 06-11-2009

12:50 مساءً ..



والله انـك شاعر يابـن فطيـس .. !!!



والله لولآ الخوف من ربي وكرهي للذنوب .. كان اقول ان التراب ابعد عليك من النجـوم !!!

كتبت فـي 02-11-2009

11:40 صباحاً ..

ها قـد عـدت ..

فيني ضيـق ..

سبحان مغيـّر الأحوال ..
 
 
11:47 صباحاً ..
 
والله لولا الخوف من ربي وكرهي للذنوب

كان اقول ان التراب ابعد عليك من النجوم

يا إلهي تطمئن بذكرك أرواح القلوب

لا اله الا انت نسجد له ولاغيره يدوم

وجهك الباقي وعبدك ينتظر منك المكتوب

ماله الا ماكتبت مايطول الا المقسوم


ياالعظيم يااللي في علمك جنه ونار وغيوم

تنجي أبوي من عذاب النار والقبر الكتوم

يالعظيم يالعظيم...

يبه يبه..

الله اللي يعلم يوم اودعك مغصوب..

يوم احطك في القبر مدري اقوم او مااقوم

ماهقيت امشي ولاخطوه ولاالحق بروق

من عرفت ان الفراق بيوم صار امره محسوم

صارت الدنيا تدور ولاعرفت الدرب نوب

مثل الاعمى صرت يبه.. ماعلّي شرهه ولوم

الوكاد اني غديت بصوب والدنيا في صوب

والحياة الله يجيرك صارت اقسى من اللزوم

كل مااذكرك يبه ينحرق شمع ويذوب

يختنق صدرالمفارق كثر ماصار محروم

اذكرك وانت هنا وهناك يصعب الهروب

وين ماأناظر اشوفك في عيوني كل يوم

اتخيل طـّلتك ومشيتك في هالدروب

حتى صوتك اسمعه نفس السوالف يارحوم

صار بيتي في عيوني موحش وكله عيوب


من رحلت لاخبر لاعلم ولاعين تنوم

ما بقى للبيت نور ومابقى للجرح ثوب

لابقى الا ذكريات بيني وبينك تدوم

يبه الله لايعاقبني ولاكني اتوب

ليت ربي ماخلق فرقى ولا موت وهموم


والله لولا الخوف من ربي وكرهي للذنوب

كان اقول ان التراب ابعد عليك من النجوم


[الله يرحمـك يابـويه]

أحب جـوّي ] ..~

كتبت فـي 02-11-2009

10:14 صباحاً ..

صبـاحكم خيـر ..
صبـاحكم ورد ..

صبـاحكم حب ..

مع انه دوامي يبدأ الساعه 2 الظهر .. بس ماعرف شوه اللي وعاني الساعه 8 وربع .. اكيد لأني تعودت على روتين نشة الصبح..فـ دايما يوم يكون دوامي الظهر اقوم الصبح

تميت احاول ارد ارقد ولكن بلا جدوى .. مافيه فايده .. قعدت فالفراش لين الساعه 9 .. محاولة مني للخلود للنوم ..!! ولكن لا حياة لمن تنادي !!..

قمت .. اتسبحت .. سويت لي كوب كوفي علشان اعدّل مزاجي شويه عالصبح .. وفتحت منتداي الغالي .. منتدى طلبة جامعة الشارقة .. عمري ما حبيت منتدى كثر ما حبيت هالمنتدى .. احس انه كلنا على قلب واحد .. صح اني ماعرف اللي فالمنتدى الا بينا علاقات سطحية تتمثل في الردود والمواضيع ولكن شيء ما يجذبني لهم .. ماعرف شو هو هالشي ..


حالياً .. كوب الكوفي بإيد .. واكتب بإيد ..

الله كم احب هذا الشعور ..


اشعة الشمس تتسلل إلى غرفة الجلوس ..
دفء رائع ..
قهوة لذيذه ..
منتدى غالي ..
جهاز نقال صامت ..

جو لا يوصف .......

علشان جيه احب انش الصبح ^^ اتوقع يعني ..

الظهر بقوم ببدل ملابسي وبروح احضر محاظراتي .. وعقب بوافيكم باللي صار معايه ..

عسى خير ..

لي عوده ..

جولة نظافه + مخآلفه ! ياعيني ياليل !

كتبت فـي 24-10-2009

2:59 مساءً ..

عندي وايد سوالف ابا اتكلم عنها ..

ذاك اليوم .. يوم كنت رايحه احذف الماده .. من الاستعجال اللي فيني وقفت سيارتي على السريع ونزلت مع اني كنت موقفتنها عدل عند W6 ولكن النحاسه انه في نفس الدقيقه اللي نزلت فيها .. يا الشرطي وحط لافته مكتوب فيها ( ممنوع الوقوف قطعيا ) .. وخالفني للأسف ..!!





الله يسامحك ياعادل ههههه .. يالله دفعة بلى !!


في نفس اليوم المغرب .. طلعت اتمشى عالبحر كالعاده .. مريت خذتلي عصير ووقفت اشربه .. وانا غرقانه فالعصير سمعت احد يدق علي دريشة السياره .. !! وشفت جنبي واقفه سياره من طراز الرنج روفر .. نازله منها بنت ..

بطلت لها الدريشه ، قالت لي : السلام عليكم ؟؟


قلتلها : عليكم السلام ورحمة الله ..

: اختي انتي مريم ؟؟

: مريم !! مريم منو ؟؟ لا حبوبه شكلج غلطانه ..

: فديييييتج والله انج تشبهين مريم !! انا آسفه وايد عالازعاج .. انا كنت اتبعج من بعيد .. مريم هذي صديقه لي من ايام الاعداديه وانتي نسخه منها !! .. ممكن اكون صديقتج ؟؟

( وانا على راسي علامة تعجب ) !!! .. وجاوبتها : ليش لا ؟؟

: قالتلي شكرا فديتج .. سيفي رقمي عندج ..

سيفت رقمها .. بس لين اليوم ما اتصلت فيها .. بصراحه انا وايد شكاكه واخاف .. ادري لازم ما اظن ظن السوء في الناس .. ولكن انا هذي طبيعتي .. الله يذكرها بالخير ..

..


ثاني يوم .. رحت الجامعه حضرت محاظراتي وروحت ..


صارلي فتره ما غسلت سيارتي ..

توجهت لمغسلة السيارات .. علشان سيارتي تتسبح وحليلها ..



وهي يالسه تتسبح .. صديت ورا .. اتطمن على صديقي ..
هذا صديقي الصدوق اللي اوديه معاي كل مكان .. فديته محد يونسني غيره .. دايما ساكت .. هادي ماشاءالله عليه ..



هديه من اغلى الناس عندي .. ربي لا يحرمني من شوفهم



بعد ما غسلت سيارتي ..رديت البيت .. ماشاءالله صارت عروس سيارتي هههههه

حطيت راسي ورقدت ..

وللحديث بقيه

أكره الكتآبه الإعلاميه !!

كتبت فـي  20-10-2009

7:54 مساءً ..

واخيراً .. حذفت مادة الكتابة الاعلامية (2) وافتكيييييت منها !!

صدق هم و انزاح عن صدري ..


كنت احاتيها بشكل !! فضييييييع ....!!

هالماده كانت مسببتلي ارق ! ما افهم فيها شي ولسبب غير معروف !! ..

قلت باخذها بعدين لما تكون عندي معاها مواد خفيفه مب شرات موادي اللي ماخذتنها الحين.. لأنه احس انه عليّـه ضغط دراسي ..

راجعه لج يا مدونتي الغاليه .. أحبج يا بوح قلبي

تمشآيه ! يآســلام ^^

كتبت فـي 10-10-2009

12:11 مساءً ..

البارحه طلعت رحت اتمشى


غيرت جو والله وايد استانست



صح اني طلعت بروحي جني قلم لوول


بس المهم اني طلعت من جو البيت شويه .


سرت اتمشيت على الكورنيش فالشارجه .. وشربت عصير .. وعقب رحت بحيرة خالد .. مريت كرسبي كريم خذتلي دوناتس .. وعقب وقفت باركن عشان آكل ههههه ماتم حد ماطالعني وانا آكل . دشو في حلجي ههههه .. لأنه الموتر بدون مخفي وامس الجمعه يعني زحمه وانا طايحه طييييح في الدونات .. ماعليه من الناس !

والله اللي يتم يحاتي كلام الناس اييلس في بيتهم احسن له ^_* هذا من وجهة نظري

بعد ما خلصت الدونات .. حرّكت .. وكان فيه تفتيش على كورنيش البحيره .. طبعاً الموتر بدون مخفي وانا وحليلي امشي شوي شوي ورابطه حزام بعد .. جان يقول لي الشرطي صفي يمين بغيت اصيح ! انا شوووووووسوييييييت ..

نزلت الدريشه : السلام عليج اختيه ..


رديت عليه : وعليكم السلام والرحمه ..



قال : اختيه ممكن ليسن ملكيه ؟؟


جان اعطيه الليسن والملكيه بكل أسى لأني اعرف اني ماسويت شي !!


ابتسم الشرطي جان يقول ! ليش انتي اصلا عندج ليسن !! شكلج وايد صغيره .. 16 سنه وايد عليج ..
اسمحيلي وقفتج .. اتحسبج تسوقين بدون ليسن !! هههههههههههه


عقب جان يقولي عالعموم مبروك عالليسن لأنه يديد .. واتحملي على عمرج .. هالله هالله ..

قلتله ان شاء الله وانا ابتسامتي من هالاذن لين الاذن الثانيه


عقب على طوول طلعت من كورنيش البحيره .. رحت آخذ عشا لـي ولأختي ..


يومي كان ممتع ومضحك بالنسبه لي..


والله يستر اليوم شوه بيصير معايه


لي عوده .. ^_^

يبـه .. [ يسمّى عيد ] ..؟

كتبـت في 20-09-2009

12:49 مساءً ..







يبه عيدٍ يمر دونك
بلا صوتك بلا عيونك
بلا عيدية وبوسه
بلا " الله "
وْ وش هالزين
ياقمرة بدنيتي تضوين
[ يسمّى عيد ] ..؟
يبه وشلون بس افرح ؟
وحزن الكون يغمرني
يبه وينك تعال اشرح
تموت لمين تتركني ؟
يبه شايف دموع العين
يبه إبعدها عن دربي
يبه ألمح بنات الناس
تعايد بيّها بإحساس
و ألم في داخلي يصرخ
أعاااااااااايد مين
أعاااااااااايد مين !!
أعايد ظلي
أو
همي !!
يبه وينك؟
يبه
حزني مكسّرني
يبه وينك ؟
تعال الحين ..!
تعال الحين
وعايدني


~ يتيـمه ~

عزلـه ؟ وخير يآطير ؟

كتبت في 09-09-2009

الساعه 5:09 عصراً ..

الحمدلله ،،

اليـوم أحس نفسيتي طيبـه ،،


وان شاء الله استمر على هالحال لين بعد الفطــور ،،

محاضراتي كانت خفيـفه اليـوم ،، والدكاتره كانوا رايقيـن ويضحكـون! ،، ياليتـهم كل يوم جيـه ..

والله انا احب الجامعه بس لولا عزلتي هذي ،!!! ..

كل ما اقول لحـد ماعندي صديقـات ينصـدم وكأني قلتله انا غيّـرت ديانتي !! استغفر الله العظيم من هذا الكلام ..

لهدرجه الصداقه تعتبر شيء مهم في حياة الانسـان ؟ ولازم تكون موجوده ؟؟

الله اعلم !! ..
انا حياتي الجامعيـه جداً عاديـه!! ..

اوصل الجامعـه احضر محاضراتي وأرّوح البيت ،، أحل واجباتي بنفسـي بدون مساعدة اي صديقـه او مشاورتها ،، اخلص بحوثي بنفسي ،، اسأل واعتمد على نفسي ان احتجت شيء ،، اشتري الكتب بروحي بدون مرافقة احد .. وكلهم يطالعوني كأنه فيه شي صاير بالدنيا ،، ياجماعه شوه فيكم ؟ الدنيا بعدها بخير

خذني معـك ، ،

كتبت فـي  14-08-2009


الساعه 2:58 صبآحاً ..

وترحل يا( أبي ) ...............

فأمسك بطرف ثوبك .. بهلع [طفلة] تختبيء من شبح اليتم ..

لا ترحل بدوني ..

خذني معك ..
أو
ابــــــــقى قليلاً ..


قليلاً فقط ...

أسترجع معك [طفولتي] وعطر الأمس ..وأماكن [الحنين] ..